Хүндүлүг чаңгыс чер чурттугларым!
Шагның чаазын уткаан чырык байырлал – Шагаа-биле чонум!
Чөөн чүк чоннарының эрги чылды үдеп, чаа чылды уткуур, чаа-чаа чедиишкиннерни сөңнээр чаңчыл болган ыдыктыг байырлалывыс – үнүп орар Шагаа-биле эң-не чылыг-чымчак күзээшкинниг изиг байырымны хүлээп ап көрүңер!
Бо чараш байырлалывыс кижи бүрүзүнге угаан-сарыылдың чаартылгазын, чырык келир үеже идегел-бүзүрелди оштап турар. Чараш ёзу-чаңчылдарывыс, ыдыктыг сагылгаларывыс чылдан чылче улам быжыгып, ооң ханы ужур-утказын кижи бүрүзү угаап билип турар апарган бис! Ооң ачызында чаа чылдың баштайгы хүн херели-биле бир деңге, эң-не арыг-чараш сагыш-бодалдар, буянныг чаагай чорукту, эки үүлени оштаан эчис күзеливис-биле Шагаавысты уткуп турар апарганы ѳѳрүнчүг.
Удавас моорлап келир Чылан чылывыста хамык багай чүүлдер тайлып, улуг чуртувустуң тиилелгези-биле доозулган, амыр-тайбың чыл болур болзунам, эргим чонум!
Шагааның ак айында ал-бодуңарга каң кадыкты, ажыл-ижиңерге чайынналчак чедиишкиннерни, аал-ораныңарга, чоок улузуңарга, аймак-чонуңарга өндүр-бедик сүлде-сүзүктү, тодуг-догаа чуртталганы, бай-байлакты, өөрүшкү-маңнайны, чаагай чолду сөңнээр-ле болзунам!
Шаг чаагай! Шагаа чаагай! Курай, курай!
Тываның Баштыңы Владислав ХОВАЛЫГ.
«Шын» №7 2025 чылдың февраль 27
