Хүндүлүг малчыннар болгаш чаңгыс чер чурттугларывыс!
Тыва чонувустуң бурун шагдан бээр ынак байырлалы – Наадым таварыштыр Силерге Тыва Республиканың Дээди Хуралының (парламентизиниң) өмүнээзинден изиг байыр чедирерин чөпшээреп көрүңер!
Бо чылын улуг чуртувус Россия Ада-чурттуң Улуг дайынынга Тиилелгениң 80 чыл оюн калбаа-биле демдеглеп турар. Бо чылын Наадым мындыг онзагай чыл-биле эртер. Ынчангаш ону республиканың чону улуг көдүрлүүшкүннүг уткуп турар.
Наадым алыс боду мал ажылдыг улустуң байырлалы болза-даа, ону дөмей-ле Тываның бүгү чурттакчылары калбаа-биле демдеглээри чаңчыл апарган. Мал ажыл-агыйы – республиканың экономиказының кол адыры, үндезини болуп турар. Тыва Республиканың эрге-чагырга органнары мал ажылын хөгжүдер дээш, хүн бүрү ажылдап, мал азырап азы ону өстүрер сорулгалыг өг-бүлелерни доктаамал деткип турар.
«Агроүлетпүр комплекизиниң продукциязын үндүр садары» регионалдыг төлевилел биле «Тываның сүдү» губернатор төлевилел чоннуң улуг деткимчезин болгаш үнелелин алган. Мал болгаш чер ажылын хөгжүдеринге улуг идигни берген бо төлевилелдер боттандырылгазы чазак-чагырга черлериниң деткимчези-биле моон-даа соңгаар уламчылаар. Ындыг болганда ол биске чүгле харыысалганы онаап турар эвес, а кызымак ажылга бедик хей-аъттыг болурувусче база кыйгырып турар.
Республиканың малчыннарының Наадым байырлалын таварыштыр силер бүгүдеге кадыкшылды, аас-кежикти болгаш төрээн Тывавыстың хөгжүлдези дээш кылып чоруур бүгү-ле ажылдарыңарга чедиишкиннерни күзедим!
Тыва Республиканың Дээди Хуралының (парламентизиниң) Даргазы К. ДАВАА.
“Шын” №27 2025 чылдың июль 17