Хүндүлүг “шынчылар” – солуннуң ажылдакчылары, хоочуннары база номчукчулары!
Тыва парлалганың хоочуну “Шын” солуннуң 100 харлаан юбилейи-биле байыр чедирип тур мен! 100 чыл – тыва парлалга чепсээниң төөгүлүг арны болурундан аңгыда, регионалдыг болгаш российжи журналистикага онза хүн.
Республиканың ниитилел-политиктиг солунунуң төөгүзү – Тываның эрткен оруу-биле сырый холбаалыг. Солун дыка хөй төөгүлүг болуушкуннарны база эде тургустунуушкуннарны эртсе-даа, бодунуң чончу туружун салбайн, кадагалап арттырган. Бот-догуннаан тыва күрүнениң тургузуушкуну, ниитилел шилчиишкиннериниң үе-чадалары, Ада-чурттуң Улуг дайынының чылдары, ССРЭ-ниң составынче эки тура-биле каттыжып киргени, чоннуң тургузукчу күш-ажылы, реформаның берге үелери, сөөлгү чылдарның нарын болуушкуннары база бурунгаар сайзыралче баскан амгы Тываның хүн бүрүде амыдыралы солуннуң арыннарында чырыттынган. Ол бүгү солуннуң кадагалаттынган көктешкилеринде артып, төөгүнүң көрүнчүү апарган.
“Шын” солун – албан ёзунуң эң-не сөөлгү медээлерин дамчыдар чоннуң ынак, чарылбас өңнүү. Чогаадыкчы ажылдакчылардан аңгыда, көдээ бижикчилерниң материалдары, репортажтары, интервьюлары, очерктери, чоннуң сактыышкыннары дээш солун чүүлдер солунда хөй.
100 чылдың дургузунда журналистерниң каш салгалдары солушкан. Билдингир ат сураглыг чогаалчылар Виктор Көк-оол, Степан Сарыг-оол, Байкара Хөвеңмей, Салим Сүрүң-оол, Кызыл-Эник Кудажы, Юрий Кюнзегеш, Күжүгет Шойгу, Донгак Бегзи, Екатерина Танова, Чооду Кара-Күске, Артык Ховалыг, журналистер Светлана Монгуш, Владимир Чадамба, Артур Хертек, Вера Куулар, Таан-оол Хертек, Шаңгыр-оол Суваң, Светлана Балчыр болгаш өскелер-даа солунга ажылдап, номчукчуларга солун медээлерни, ажыктыг тайылбырларны, ажыл-агыйжы болуушкуннарны чырыдып чораан.
Үе аайы-биле чаартылгалар нептереп, сан-чурагайжыдылга тергиидеп, «Шын» солун электроннуг хевирже база шилчизе-даа, бодунуң туружун, шынчызын ам-даа чидирбээн, чоннуң эң ынак солуну болуп арткан.
“Шын” солуннуң коллективинге чогаадыкчы эгелээшкиннериңер, харыысалгалыг ажылыңар болгаш ажыл-албаныңарга бердингениңер дээш, четтиргеним илереттим!
Солуннуң номчуштуг чоруун салбас дээш, чогаадыкчы дилээшкиннерни, бурунгаар сайзыралды, чаартылгаларны күзедим!
Тываның Баштыңы Владислав ХОВАЛЫГ.
2025 чылдың август 28 “Шын” №33