Декабрь 22-ден тура бүгү өөредилге черлеринде ёлкалар болуп эгелээн. Кызыл хоорайның М.А. Бухтуев аттыг 1 дугаар школазының Чаа чыл байырлалынга сонуургап четтивис.
Школаның спорт залының ортузунда өң-баазын илчирбелер, мишуралар, ойнаарактар-биле шиметтинген улуг шивизи биргиклассчыларны манап тур. Койгун, Дииң, Адыг, Бөрү болгаш Терминатор, Человек-паук дээш өске-даа амгы үениң мультфильмнериниң маадырлары кылдыр кеттинген чаштар Соок-Ирей болгаш Харжыгашты уткуп алдылар.
Улуг класстың өөреникчилери Соок-Ирей биле Харжыгаш баш удур белеткээн программазын ёзугаар чаштарга оюн-тоглааны көргүстү. Олар чөөн чүк календарының 12 дириг амытаннарының танцы-самын, ыр-шоорун бараалгаткан соонда, биргиклассчылар Соок-Ирей болгаш Харжыгаш-биле ырлап-шоорлап ойнап-хөглээн.
Байырлалдың хуулгаазынныг байырлалынга уруглар улуг сонуургал болгаш өөрүшкү-биле киришкеш, чигирзиг белектерлиг тарап чанганнар.
А. ОНДАР.
Буян ООРЖАКТЫҢ тырттырган чуруктары
“Шын” №50 2025 чылдың декабрь 25
