Тыва улустуң национал байырлалы, малчыннарның Наадымы республиканың найысылалы Кызыл хоорайда “Хүреш” стадионга байырлыг байдалга ажыттынган.
“Хүреш” стадионга чыылган чоннуң мурнунче Тыва Республиканың мал ажыл-агый адырынга чемпионнарны чалаан. Таңдыдан Леонид Оюн, Улуг-Хемден Сыдым-оол Ханды, Чаа-Хөлден Белек Кызыл-оол, Чөөн-Хемчиктен Экер Моңгуш, Барыын-Хемчиктен Владимир Хомушку, Эрзинден Алик Муна, Кызыл кожуундан Омак Моңгуш, Бай-Тайгадан Василий Хертек, Тес-Хемден Омак Ак-оол, Тере-Хөл кожуундан Бады-Мөңге Чамыян, Өвүрден Владимир Моңгуш, Бии-Хемден Вадим Чамзы, Каа-Хемден Андриян Моңгуш, Чеди-Хөл кожуундан Альберт Ховалыг, Сүт-Хөлден Виталий Моңгуш, Мөңгүн-Тайгадан Эрес-оол Иргит чүгүрүк аъттарын, Тожудан Константин Ак ивизин мунупкан, холдарында кожууннарының туктарын киискидир тудуп алган, чон мурнунче байырлал хөгжүмүнүң үделгезиниң аайы-биле халдып үнүп кээрге, чоргааранчыг-ла чорду.
Тываның Баштыңы Владислав Ховалыг Наадым байырлалы-биле малчыннарга, чонга байырны чедирип, ажыл-ишке чедиишкиннерни күзээн.
Республикага мал ажылын хөгжүдеринге киирген үлүү дээш Бай-Хаак суурда хууда дузалал мал ажылдыг Олег Николаевич Лашовка Тываның Баштыңының Өөрүп четтириишкин бижиин тывыскан.
Хөй чылдарда мал ажылынга ак сеткилдиг ажылы дээш Тере-Хөл кожууннуң Шынаа сумузунда хууда дузалал мал ажыл-агыйлыг Чойгана Седиповна Шивитти, Улуг-Хем кожууннуң Чодураа сумунда хууда мал ажыл-агыйлыг Виктор Донгакович Эртинени Тываның Баштыңының Хүндүлел бижии-биле шаңнаан.
Көдээ ажыл-агыйны сайзырадырынга киирген үлүү дээш Тес-Хем кожууннуң Чыргаланды сумузунуң даргазы Менди Сиириповна Самдаракты Тыва Республиканың 100 чылының юбилейлиг медалы-биле шаңнаан.
“Тыва Республиканың алдарлыг малчыны” атты Сүт-Хөл кожууннуң Кызыл-Тайгадан Буян Шойдаевич Ондарга, Бии-Хем кожуунда “ЛидерМ” көдээ ажыл-агыйның удуртукчузу Сергей Иванович Мерзликинге, Бай-Тайга кожууннуң Шуйдан Адыг-оол Отугуевич Салчакка, Чаа-Хөл кожуунда мал ажыл-агыйының баштыңы Вера Анай-ооловна Үндүнге, Мөңгүн-Тайганың Мугур-Аксында мал ажыл-агыйының баштыңы Байлак Багай-оолович Хертекке, Чаа-Хөл кожуундан Дукар-оол Доңгакович Маскыр-оолга тывыскан.
Тывага чылгы мал ажыл-агыйын сайзырадырынга киирген үлүү дээш “Тыва Республиканың алдарлыг чылгычызы” атты Өвүр кожууннуң Дус-Дагда чылгычы Чонар-Даш Ортун-оолович Кууларга, Кызыл кожууннуң Чербиден Олег Тараачынович Моңгушка, Чадаанадан Виктор Белек-оолович Хомушкуга тывыскан.
Чылгы мал ажылын хөгжүдеринге көскү үлүү дээш “Дамды” көдээ ажыл-агый кооперативиниң баштыңы Андрей Дартан-оолович Ондарны Тыва Республиканың медалы-биле шаңнаан.
Республиканың көдээ ажыл-агыйын хөгжүдеринге киирген үлүү болгаш хөй чылдарда ажылы дээш “Тыва Республиканың көдээ ажыл-агыйының алдарлыг ажылдакчызы” атты күш-ажылдың хоочуну Кызыл Николаевич Сержиге тывыскан.
Малчыннарның Наадымының Кызыл хоорайда “Хүреш” стадионга байырлыг ажыдыышкыны Тываның уран чүүл ажылдакчыларының улуг концерти-биле доозулган.
Ш. МОҢГУШ.
Буян ООРЖАКТЫҢ тырттырган чуруктары.
![](https://sun4-19.userapi.com/s/v1/ig2/aSG2FMU0HrYedsAqPs5TSM4scMTQJ4hzGk1us_BoDlx15G9DdPv11yl6gCKeTKdnfh6YMoi6JXOHRYi0rRC3CNLM.jpg?quality=95&as=32x21,48x32,72x48,108x72,160x106,240x159,360x238,480x318,540x358,640x424,720x477,1080x715,1280x848&from=bu&u=r9Zbk7rzb13Jpw2WX2rtFW0DrXyKOMbJRY_JAEWrGdI&cs=604x400)