Республикада ажы-төлдүң төрүттүнүп турары хөй болганда, оларны өөредир школалар база немей хереглеттинер. “Өөредилге” национал төлевилелдиң ачызында регионда элээн хөй чаа школалар туттунуп, ажыглалче кирип турары канчаар-даа аажок өөрүнчүг. Эрткен өөредилге чылының төнчүзүнде Сукпакка база Бай-Хаак кудумчузунга амгы үениң негелделеринге дүүшкен школалар ажыттынганын билир бис. А 2024–2025 өөредилге чылының эгезинде Вавилин ээтпээнде болгаш Таңдының Балгазында чаа школалар чуттакчы чонга аажок улуг белек болуру чугаажок.
Бичии балгазынчыларны кончуг-даа чараш, кайгамчыктыг школа манап турар. 616 олуттуг школа бо чылдың сентябрь 2-де эжиктерин уругларга ажыдар. Амгы үеде 603 өөреникчи школаже киир бижиттинген. Оларның иштинде 60 бирги классчыны хүлээп алган. Школа чаа өөредилге чылынга барык 100 хуу белен дээрзин өөредилге чериниң директору Чаяна Оюн дыңнаткан: “Сентябрь 2-де уруглар хүлээп алырынга белен бис. Бо школаның онзагай чүүлү амгы үениң негелделеринге дүүштүр туттунган болгаш кабинет бүрүзү өөредир эртеминге дүүштүр чаа дериг-херекселдер-биле чүмнеттинген. Оолдарга болгаш уругларга күш-ажыл кичээлиниң, хөгжүм, химия, физика дээш шупту бүрүн дерилгелиг. Бисте 2 чурагайлыг өөредилге кабинеди, 4 өзүлде точказының кабинеди бар. 300 олуттуг улуг хуралдаар зал база бар. Аңаа өөредир, кижизидер сорулгалыг янзы-бүрү хемчеглер, театр болгаш шии бөлгүмнери эрттирер. Оон ыңай 2 спорт зал, 2 тренажерлуг зал, херим иштинде улуг стадион база бар”. Уруглар-биле немелде кичээлдер эрттирер тускай дериттинген өрээлдер база барын директор тайылбырлаан. Оларга “чалыы натуралистер станциязы”, “школачыларның арга-арыг ажыл-агыйы” хамааржыр.
Школаның стадионунга кандыг-даа хевирниң спортчуларын шыырак белеткеп болур. Ында волейбол, баскетбол, футбол база улуг теннис шөлү безин бар. Ол ышкаш эге класс өөреникчилеринге хостуг үезинде херим иштинге ойнаар шөлчүгештер база кылдынган.
Школада башкылар саны четчир. Бо чылын коллективте 3 чаа башкы немежип келген. Оларның ийизи “Мен башкы мен” деп программа-биле келген. Оларга сан болгаш информатика башкызы, логопед база дефектолог башкылар хамааржыр.
Бо улуг чаа школага чүгле Балгазынның эвес, суурдан 10 хире километр ыракта Сой, Кызыл-Арыг суурлардан база өөреникчилер кээп өөренир. Ол өөреникчилерни аай-дедир чедирер 4 автобус база бар.
Чыжыргана СААЯ.
Ада Тюлюштуң тырттырган чуруктары.
«Шын» №66 2024 чылдың август 31
