Таңды кожууннуң төп эмнелгезиниң Балгазын суурда чыдар салбырында капитал септелге ажылдары кидин түлүк чоруп турар. «Узун болгаш идепкейлиг назын» национал төлевилелдиң кадык камгалалының бирги звенозун эде чаартыр программа-биле төлевилел боттанып турар. Бо хүнде объект 89 хуу белен.
Септелге ажылдары шапкынчаан, ооң иштинде эрги дээвиирни, шалаларны, даштыкы шывыгны, ханаларны болгаш кырын бускан. Ыяштан чаа шалаларны чадып, пластик соңгаларны салып, даштын чылыглаан.
База ол ышкаш канализация хоорзаларын шөйүп, чаа крышаны тургузуп, цемент-чоңгудан ДСП-лерни салып, ханаларны керамиктиг плитка-биле шыпкан. Оон аңгыда ханаларны болгаш дээвиирни шеверлээр, чырык удазыннарын кожар, одалга системазын салган. Эң сөөлүнде демир сайдинг-биле даштын шыпкан.
Тыва Республиканың кадык камгалал сайыды Анатолий Югай ажылдар эгелеп турда, хынап чорааш, немелде дугуржулгага дүүштүр баштайгы чарыгдалды өскертпейн, планнаттынган ажылдың хемчээлин бедидер саналды киирген турган. «Ниитизи-биле алырга, доктаамал хынап турар болгаш, ажылдың шынарынга хамаарыштыр онза чемелелдер чок. Ынчалза-даа ажылдарны дооскан соонда, хүлээп алыышкын документизинге комиссия нормативтер езугаар атты салыр» — деп, ол онзалап демдеглээн.
Амгы үеде даштыкы шывыгны, херимни тудуп, объектиниң девискээрин чаагайжыдып турар, ол суурнуң чурттакчыларынга таарымчалыг байдалды тургузуп, эмчи ачы-дузазының шынарын бедидеринге чугула базым болур. «Узун болгаш идепкейлиг назын» национал төлевилел-биле бо чылын Тывада 5 объектиде капитал септелге ажылдары чоруп турар, 10 чаа фельдшер-акушер пунктуларын болгаш 2 эмнелге амбулаториязын тудуп турар.
ТР-ниң Чазааның медээзи болгаш чуруу.
«Шын» №22 2025 чылдың июнь 12
