Чурттуң эң кол шаңналы – Россияның Президентизиниң тургусканы тус чер чагыргаларының төлээлериниң аразында «Бараан болуру» деп III Бүгү-российжи муниципалдыг шаңналче кордакчыларны идип үндүрер ажыл эгелей берген. Ооң эрттирикчизи – Бүгү-россияның тус чер бот-башкарылгазын сайзырадыр ассоциация (ВАРМСУ). Бодунуң чурттап турар чериниң сайзыралынга онзагай үлүүн киириштирген эң-не көскү ажылдыг муниципалдыг тургузуглар идепкейжилерин бедии-биле үнелеп, демдеглээр шаңнал болур деп ТР-ниң Чазак Баштыңы Владислав Ховалыг социал четкилерде бодунуң арнынга демдеглээн.
Бис эрткен чылын аңаа эки киришкен бис. Таңды кожууннуң чогаадыкчы болгаш салым-чаяанныг башкызы Тамара Иргиттиң «Мээң өг-бүлемниң чаңчылдары» деп төлевилели Россияның «Бараан болуру» шаңналының 100 тергиин төлевилелдериниң аразынче кирген. Өг-бүлениң үнелиг чүүлдерин кадагалап арттырып алыры-биле төлевилелдиң киржикчилери лекцияларны, мастер-класстарны эрттирип, психологтар болгаш юристерниң тренингилерин, консультацияларын чоруткан. Бо төлевилел бүдүн чуртка өг-бүлениң кежигүннериниң аразында харылзааларны быжыглаарынга эң эки үлегер кылдыр санаттынган.
Бо чылын күрүне шаңналынга киириштирери-биле аңгы-аңгы угланыышкыннарлыг 10 номинацияны ажылдап кылган. Аңаа муниципалдыг тургузуг бүрүзүнден чаңгыс-даа төлээ азы бүдүн команда күзелдии-биле боттарын көргүзүп, төлевилелдерин киириштирип болур. Төрээн Тывавыстың хөгжүлдезинге идигни бээр ажыктыг, солун төлевилелдерни улуг чуртка бараалгадып киржир кылдыр чогаадыкчы ёзу-биле ажылдап чоруур чаңгыс чер чурттугларын Тываның Баштыңы В. Ховалыг кыйгырган.
Чагыгларны ноябрь 21-ге чедир премияслужение.рф албан сайтызын дамчыштыр киирип болур.
Бистиң корр.
Чурукту В. Ховалыгның социал четкиде арнындан алган.
“Шын” №44 2025 чылдың ноябрь 13
