Бараан өртээ чаъс соонда мөөгүлер дег…

Мени хүн бүрүде мындыг айтырыг дүвүредип чоруур. Акша-шалың, пенсия ай санында өзүп турар-биле дөмей садыгларда бараан өртээ чүге чаъс соонда мөөгүлер дег өзүп турарыл?

Бо таварылгада чогуур албан черлери эвээш орулгалыг өг-бүлелер-биле кандыг ажыл чорудуп турар ирги? Кандыг-даа садыг-саарылга чериниң ажылдакчылары пенсия-биле амыдырап турар ада-иелиг, төрелдерлиг болгай. Ынчангаш бо айтырыг кижи бүрүзүнге хамааржыр боор деп бодаар мен.

Ай санында пенсияларга ынча-мынча акша немээр деп интернет четкизинде бижиктерге бүзүрээн херээ чок. Кырып назылааны дээш социал пенсияларны чылда чүгле чаңгыс удаа индексастап турарын билип алыры артык эвес. Бүгү назынында шаңнал-макталга-даа чедир ажылдап каан пенсионер кижи 10 муң рубль бичии-ле ажыг акша пенсия ап, амыдырап олурар. Ынчангаш алдан хар ажып-даа чоруур пенсионерлерниң ажылдан халбактанып чыдар чүвези ол. Пенсия акшазы четчир болза, чүге ажылдаар деп.

Харын бо чаш ажы-төлге төлевирлер тыптып келген чүгээр-дир. Ылаңгыя көдээ суурларда ажыл-агый бар эвес. Бөдүүн чон дыка-ла шыдамык бис ийин. Ажыы-биле чугаалаарга, бис, бөдүүн пенсионерлер, ажы-төлүвүс азыраар дээш, идик-хеп безин садып кетпейн чоруур бис. Ол акша-биле бичии эм-дом садып алырывыска, экизи ол, дөмей-ле чедишпес. Кым чүү деп бодап турарыл, хүндүлүг пенсия алыкчылары. Кыш дүжерге, хөмүр-даш, одаар ыяш чедишпес, чайын куда-дой шуут үзүлбес, халап болган чон-дур бис ийин.

Ол ышкаш «социал хөмүр», «социал картофель» деп чонга социал деткимчелерниң хемчээлин база үениң аайы-биле өстүрер болза эки. Өртектер өзүлдези бергедедип келди ышкажыл.

Бөлүк пенсионерлерниң мурнундан А. ОНДАР.