«Чурттаарынга таарымчалыг хоорай хүрээлеңин хевирлээри» федералдыг төлевилелдиң онлайн бадылаашкыны бо хүннерде чоруп турар. Хоорай, суурларның чурттакчы чону төрээн чериниң чаагайжыдылгазы дээш бодунуң үнүн чаңгыс катап берип болур. Кожууннар каш-даа төлевилелди онлайн бадылаашкында киириштирип турар. Кожуун бүрүзүнден бир төлевилел онлайн бадылаашкынга эң-не хөй үннү алгаш, 2024 чылда ук төлевилелин боттандырарынга федералдыг акшаландырыышкынны алыр эргелиг болур.
Барыын-Хемчик кожуундан ниитизи-биле беш төлевилел бадылаашкында киржип турар. Барлык сумузунга улуг-даа, бичии-даа уруглар ойнаар спортчу шөлдү бүрүнү-биле шүмнээр, аңаа ажык сцена база тудары көрдүнген. Ийи дугаар төлевилел болза, Аксы-Барлык сумузунуң төп кудумчузунда девискээрге ниитизи-биле 15 000 дөрбелчин метр черни чаагайжыдар. Аңаа спортчу шөлдер болгаш дыштаныр булуңчугаш база турар. Үш дугаар төлевилелде Кызыл-Мажалыктың Садовая, Чүргүй-оол, Коммунальная кудумчуларын чаагайжыдып, узун сандайлар, бок октаар савалар тургускаш, сайгылгааннар киирер. Дөрт дугаарында, Кызыл-Мажалыктың Буян-Бадыргы төп кудумчузун чаагайжыдар. Бешки төлевилел — Шекпээр сумузунуң Ленин кудумчузунда Демнежилге шөлүн чаагайжыдып, чурттакчы чонга дыштанырынга таарымчалыг болгаш эптиг байдалдарны тургузары көрдүнген.
Үстүнде даңзыда кирген төлевилелдерниң чүгле бирээзи келир 2024 чылда акшаландырыышкынны алыр. Ынчангаш бо төлевилелдерниң кайы-бирээзин боттандырар дээр болза, тус черниң чурттакчылары онлайн соңгулдага идепкейлиг киржир болза эки. 14 хардан өрү назылыг хамааты бүрүзү чаңгыс катап соңгуур. Хоорайда азы Тывадан дашкаар-даа чурттап чоруур чаңгыс чер чурттугларывыс бодунуң төрээн суурунуң хөгжүлдези дээш, онлайн бадылаашкынга киржир эргелиг.
Барыын-Хемчик кожууннуң чону өске кожууннарга көөрде, онлайн бадылаашкынга идепкейлиг киржип турар дээрзин күрүнениң ачы-дуза платформазындан (госуслуги) көстүп турар. Беш төлевилелдиң аразындан Барлык сумузунуң чурттакчылары амдыызында эң-не хөй 2399 үннүг болза, ийиги черде Аксы-Барлык сумузу – 2223 үннүг, а Шекпээр дээш амдыызында 2052 кижи соңгаан. Кызыл-Мажалыктың ийи төлевилелиниң бирээзи 1902, а өскези – 39 үн алган.
Онлайн бадылаашкынның доостурунга чедир каш-ла хонук арткан-даа болза, май 31-ге чедир ам-даа үе бар. Соңгуваан хамаатыларны онлайн бадылаашкынга киржип, бодунуң чурттап турары азы төрээн чериниң девискээриниң чаагайжыдылгазынче кичээнгейин угландырарынче кыйгырдывыс!
/ Айдың ОНДАР.
Чурукту интернет четкизинден алган.
"Шын" №33 2023 чылдың май 6
