БАРЫЫН-ХЕМЧИК КОЖУУНУ
Ак-Довурак — Абаза аразының оруунда үрелиишкинниг черни оюп эртер орукту кылып эгелээн. Ында “Восток” КХН-ниң 8 кижилиг болгаш 4 техникалыг (КамАЗ – 2, экскаватор — 1, трактор — 1) бөлүү ажылдап турар, Барыын-Хемчик кожууннуң чагырга черинден 2 кижини, 1 техниканы (ВАЗ) хаара туткан.
Күштү база дериг-херекселдерни калбартыры-биле Кызылдан немелде тускай техника ынаар үнүпкен.
Ак-Довурак — Тээли оруунуң 7-ги километринде Хөнделең хемни кежилдир көвүрүглеп машина-балгат эртер оруктуң чамдыызын суг чууй шапкан-даа болза, оон эртип болур. Айыыл чок. Септелге – катап тургузуушкун ажылдары чоруп турар.
Шыдаяк деп черже углай Алаш хемниң Үстүү-Алаш деп черинде көвүрүгнүң кезик-чамдыызы үрелген. Сугнуң бадарын манап алгаш, септелге, катап тургузуушкун ажылдарын чорудар.
«Ак-Довурак – Хөнделең» аразының оруунда көвүрүглеп эртип болур. Үрелген черлерни Ак-Довурак — Абаза оруунда көвүрүгнүң катап тургузуушкунунуң талазы-биле ажылдарны доозары билек кылыр.
БАЙ-ТАЙГА КОЖУУНУ
Бай-Тайга кожууннуң девискээринде чарлаттынган онза байдалдар чурумун ам-даа ужулбаан, суггур чаъстарның түңнелинде, Алаш, Дапсы, Хемчик хемнерниң суу көдүрүлгенинден регионалдыг болгаш тус черниң оруктарының бир кезек черлеринде орук дөжээ үрелген. Ол черлерде дежурныйлаашкынны организастаан, улус-чонну өй-шаанда дыңнаткан.
Когараан девискээрлерде аъш-чемниң, эм-таңның курлавыры бар. Дарый көжүрери көрдүнген аар аараан кижилер чок.
Тээли суурдан 12-ги километрде турар Хемчик хемни кежилдир көвүрүг биеэги чурум езугаар ажылдап турар.
Тээли — Кызыл-Даг аразының Хемчик хемни кежилдир көвүрүүнүң сугга буза шаптырган черлеринде эрик быжыглаар ажылдар чоруп турар. Ында 4 техниканы (экскаватор, чүдүрүкчү болгаш 2 самосвал) хаара туткан.
Бо хүннерде Бай-Тал – Шивилиг аразынының оруунда 2 көвүрүгнүң кирер черлери сугга чууй шаптырган. Орукту биеэги байдалче киирери-биле тус черниң сайгарлыкчызының 1 экскаваторун болгаш 1 самосвалын септелге ажылдарынга киириштирер деп турар.
Кара-Хөл суурже кирер автоорукта 5 кижи, 3 техника (1 экскаватор, 1 самосвал, 1 автогрейдер) ажылдап турар. Бо угланыышкында Дапсы, Огар, Алаш хемнерни кежилдир, а ол ышкаш Алаштың Арамай деп черинде көвүрүглерни суг алган.
Амгы үеде сугга алыскан бажыңнар чок, чонга айыыл-халап тургустунмаан. Июнь 15-тиң дүнекиниң 3.00 шакта чырыкты кылган болгаш катап кывыскан.
Эртер орук чок.
СҮТ-ХӨЛ КОЖУУН
Июнь 14-түң дүнезиниң байдалы-биле алырга, Суг-Аксы – Чадаана аразының автооруу улуг сугдан хосталган, олап кандыг-даа машиналар эртип турар.
Суг-Аксы, Алдан-Маадыр суурларның камгалал чалдарынга сайны немей төккен. Чурттакчылар боттарының бажыңнарынче ээп келгеннер.
Үерниң уржуктарын чайладырының талазы-биле ажылдар планнаттынган.
/ А. ХЕРТЕК белеткээн.
"Шын" №44 2023 чылдың июнь 17