Тываның чогаалчылар эвилелиниң ажыл-чорудулгазы элээн шапкынчаан. Бо чогаадыкчы ажылда аныяк чогаалчыларның үлүг-хуузу база улуг.
Аныяк чогаалчыларга орукту ажыдып, чогаал оруунче деткимчени көргүзүп чоруур башкывыс, Тываның чогаалчылар эвилелиниң даргазы Сайлыкмаа Комбунуң ажылын демдеглевес аргажок. Чогаал, шүлүктерин делегей четкилеринге, солуннарга парладып, боттарының хуузунда чоруп турган чогаадыкчы аныяктарны чаңгыс черге чыып, шүлүк, чогаалдарынга сайгарылгаларны кылып, өөредилгелерни эрттирип тургаш, номнарын үндүреринге улуг дузаны чедирип чоруурунга өөрүп турар бис.
Социал четкилерде «Шүлүктерим аялгазы», «Алдын бийир», «Мөңгүн бийир» деп шүлүк бижииринге сонуургалдыгларның чечен чогаал каттыжыышкыннары ажыттынып, республиканың бүгү булуңнарындан хөй кижи киржип, бот-боттарындан өөренип, бижип чоруурлар. Сайлыкмаа Салчаковна бо чүүлдү үезинде эскерип, оларны деткип, Чогаалчылар эвилелинче киирер аргазын көрүп турар. Чогаадыкчы аныяктарның аразындан эң-не кызымак, чүткүлдүг, уран талантылыгларны чогаалчы деңнелинче үндүрүп турары дээрге-ле башкының тыва дылывыс дээш, Тыва чуртувустуң чечен чогаал ажылының сайзыралы дээш кызып чоруурунуң херечизи.
«Алдын бийир» чечен чогаал каттыжыышкынының чыыжынга келгеш, шүлүк бижииринге сонуургалдыгларга: «Силерниң уран талантыңар бар-дыр. Ынчангаш черле ара доктааваңар, бижиңер-ле бижиңер. Бижээн шүлүктериңерни катап-катап сайгарыңар» — дээн чагыг-сүмези оларга дыка улуг бүзүрелди болгаш бурунгаар базымнарны берген.
Сайлыкмаа Салчаковна социал четкилерде ажыттынган чечен чогаал каттыжыышкыннарының кежигүннеринге арга-сүмезин берип, оларның номнарын үндүреринге дузалажып, редакторлап берип чоруур.
Чогаалчылар эвилелиниң кежигүннери апарган, «Алдын-Бийир» чечен чогаал каттыжыышкынының кежигүннериниң бо эрткен ийи чыл дургузунда 20 ажыг номнары үнген. Ам-даа номнарын үндүреринге белеткеп турар аныяк чогаалчылар бар. Чамдык аныяк чогаалчыларның чараш шүлүктери ырылар болуп хуула бергени чоргааранчыг. Башкывыстың ачызы-биле орус дылдан очулгаларны, редакторнуң, корректорнуң ажылдарын кылып, өөренип турар бис.
Башкывыс Сайлыкмаа Комбуга биске арга-сүмезин берип, чогаал оруунче эдертип чоруурунга өөрүп четтиргенивисти илередип, дараазында алдын-бийиржи, аныяк шүлүкчү Аяс Санчай-оолдуң одуругларын башкывыска бараалгаттывыс.
Чедиишкинче углап кагды
Херээжен чон аразындан анаа эвес –
Херелденген ёзулуг-ла эртиневис.
Даштындан-на хүннээректи сагындырган,
Даң хаяазы дег ишти-хөңнү чайыннаан!
Ава Тыва ховар каазы сиңген ышкаш,
Алыс четче сөстер-биле чуруттунмас.
Чүден артык каасталгазы чүрээнде-дир –
Чүгле ону өттүр көрген улус билир!
Биче болгаш бөдүүн сеткил хойлап алгаш,
Бисти чайгаар сорунзалай чыыра тырты.
Чечен чогаал оранынче уштап-баштааш,
Чедиишкинче, сайзыралче углап кагды.
«Алдын-Бийир» чечен чогаал каттыжыышкынының аныяк чогаалчылары.
"Шын" №55, 2023 чылдың июль 26