"Сүбедей" спорт өргээзинге апрель 12–13 хүннеринде 2013–2014 чылдарда төрүттүнген оолдар, уруглар аразынга бир дугаар Республиканың бирги чери дээш баскетбол маргылдаазы болуп эрткен. Маргылдааны Спорт яамызы база республиканың Баскетбол чөвүлели, баскетболду школаларга сайзырадыр база келир үениң шыырак ойнакчыларын илередип, улаштыр белеткелди чорудар сорулганы салганнар.
Хөглүг, солун байдалга эрткен маргылдааның түңнелинде уруглар аразынга ырак Мөңгүн-Тайга кожууннуң демниг командазы чараш оюнун көргүзүп, бүзүрелдии-биле бирги черге төлептиг болган. Ийи дугаар черни Тес-Хем кожууннуң найыралдыг командазы алган. Үшкү черже тиилелгеже чүткүлдүг Каа-Хем кожуундан Дерзиг-Аксы школазының командазы кирген. Оолдар аразынга 1-ги черге бүзүрелдии-биле "Сүбедей" спорт школазының найыралдыг командазы төлептиг болган. Ийи дугаар черни ачыр-дачыр изиг оюннуң түңнелинде, Барыын-Хемчиктиң командазы алган. Үшкү черже Бай-Тайганың демниг командазы кирген.
Маргылдааның тергиин ойнакчызы баскетболдуң өзүп олурар бичии сылдызы Ай-Хээ Доржу болган. Бо спортчу байырлалдың деткикчилери ада-иелерге, Спорт яамызынга, Баскетбол чөвүлелинге бүгү чоннуң мурнундан баскетболдуң келир үезинче улуг кичээнгей салып турары дээш өөрүшкүнүң йөрээлин салып, курайлаан.
Алексей ЧАМБАЛ-ООЛ, спорттуң хоочуну.
Чуруктарны ТР-ниң баскетбол федерациязындан алган.
“Шын” №14 2025 чылдың апрель 17
