Сентябрь 1-ден тура Россияныӊ школачылары «Айыыл чок чоруктуӊ болгаш Төрээн чериниӊ камгалалыныӊ үндезин билиглери» деп чаа эртемни өөренип эгелээн. Чаа эртемге шериг белеткелиниӊ талазы-биле уругларның билир ужурлуг чүүлдерин немээн. Кызылдыӊ президентиниӊ кадет училищезинге ук кичээлдиӊ баштайгы олимпиадазы болуп эрткен. Аӊаа Тываныӊ школаларыныӊ чүс ажыг өөреникчилери киришкен.
Олимпиадага өөреникчилерниӊ теория талазы-биле билиин хынаан, а кылып билир чаӊчылдарын практика кырында көргүзүп турганнар. Уруглар сугга, өртке болгаш өске-даа айыыл-халаптыг байдалдарда өске кижиниӊ амы-тынын камгалаар, баштайгы дуза чедирер талазы-биле билиг-мергежилдерни көргүскен.
— Олимпиадага киржир дээш, элээн үр белеткенип келдим. Эӊ-не берге даалгаларныӊ бирээзи Калашников автоматты часкаш, катап эптеп чыыры. Чүгле 80 секунда иштинде кылып четтигер херек, ооӊ октарын савазынче чүгле 30 секунда иштинде чыып сугар ужурлуг – деп, Марат Майдыр чугаалаан.
— Амыдыралга кандыг-даа бергелер таваржы берзе, аӊаа кезээде белен болурунга кижини өөредип турары-биле бо олимпиада ажыктыг. Оон аӊгыда, патриотчу чорукка кижизидип, айыыл чок чорук болгаш камгалал талазы-биле билигни ажыглап билиринге чаӊчыктырып турар – деп, Лия Арзылаң чугаалаан.
Олимпиаданыӊ шииткекчилери — Тываныӊ күрүне университединиӊ башкызы болгаш студентилери. Шылгараӊгай чедиишкиннерлиг өөреникчилерни олар илередир.
«Айыыл чок чоруктуӊ болгаш Төрээн чериниӊ камгалалыныӊ үндезини деп эртемниӊ баштайгы олимпиадазын эрттирип турарывыс бо. Кызылдыӊ президентиниӊ кадет училищезиниӊ коллективи, Онза байдалдар болгаш айыыл-халап медициназыныӊ яамызыныӊ специалистери аӊаа дузалаан дээрзин «Сылдысчыгаш» салым-чаяанныг уруглар илередип тывар болгаш деткиир төвүнүӊ методизи Урана Эртине дыӊнаткан.
Бүгү-российжи школачылар олимпиадазыныӊ регионалдыг чадазыныӊ тиилекчилери Тываныӊ өмүнээзинден ооӊ федералдыг чадазынга киржир.
Бистиӊ корр.
“Шын” №8 2025 чылдың март 6