Адакталып турар 2024 чылда угбам Сара Монгушевна ООРЖАК 75 хар юбилейин демдеглеп эрттирип турар. Мугур харлаан юбилейи база Иелер хүнү-биле угбамга байыр чедирип тур мен. Чоокта чаа Экономистер хүнү база эрткен болгай. Угбам "Шекпээр" совхозка, Шагаан-Арыгга-даа экономистеп ажылдап турду. Оон хөй чылдарда Республиканың Уруглар фондузунга чаш ажы-төлге буян кылыр ажылды сеткилиниң ханызындан удуртуп чорду, чон ону утпаан.
Амгы үеде хүндүлүг дыштанылгада угбам беш ажы-төлүнүң ынак иези, хөй-хөй уруг-дарыының энерелдиг кырган-авазы. Угбавыска хөй санныг дуңмаларының өмүнээзинден бо шүлүктү бараалгадыр-дыр мен.
«Салбастай бээр» дижиривис
Сарыг дыттыг Чадаананың,
«Барыксанчыг» атты алган
Бажың-Алаак уруу-ла сен.
Хөөлбээнге эштип, ойнап,
Хорумнугдан көк-каттап каап,
Хөлчок солун өскен ийик бис.
Иелерниң хүнү-биле
Идегелдиг угбам сеңээ
Төрүттүнген хүнүң-биле
Төрелдериң мурнундан мен
Баштак сөстүг байыр тудуп,
Бажың чыттаайн, эргим угбай.
Кара чаңгыс, чүү-даа канчаар,
Кадыкшылды күзеп тур мен.
Кадык-ла чорза, кижи тоовас.
Кандыг-даа күзел чогуп-бүдер:
Аас-кежик, өөрүшкү-даа
Ала-чайгаар боду келир.
Раиса САТ,
«Тываның культура болгаш уран чүүлүнүң хүндүлүг хоочуну» аттың эдилекчизи.
«Шын» №90 2024 чылдың ноябрь 23