Дендии изиг хүннерде кондиционер чокка изигден канчаар камгаланып болурул.
Соңгаларга кылын көжегелер азы жалюзи азар. Хүннүң херелдери өрээлче киргеш, агаарны изидиптер. Ынчангаш кылын көжеге азы жалюзи-биле соңгаларны хүндүс дуглап алырга эки.
Соңгаларга плёнка чыпшырар. Көжеге азы жалюзи өрээл иштин караңгыладыптар, а хүнден камгалаар плёнка чырыкты бээр.
Бажың иштин шын агаарладыңар. Хүндүс соңгаларны ажытпас болза эки: бажыңче изиг агаар кирер. Соңгаларны сериин үелерде ажыдар: даң бажында 4.00 шактан 8.00 шакка чедир, кежээ 22.00 шак соонда.
Агаарны шыгыдар. Соок суг бажың иштин сериидедиптер. Пульверизаторже аажок соок сугну куткаш, бир шак чартык болгаш-ла бүлгүртүр.
Плитка болгаш духовканы эвээш ажыглаар. Ол электрилиг хөнек, илиир, кофеваркага база хамааржыр — олар агаарны изидер. Харын-даа компьютер болгаш телевизорну, херек чок болза, өжүрер.
Лампочкаларны солуур. Анаа лампочканы светодиодтуг лампаларже солааны дээре: олар белен изивес.
Плиткага чем кылгаш, азы ваннага чунгаш, изиг агаар сордурар «вытяжканы» кыпсыр. Ол өрээлдиң изиг агаарын база бузун үндүр соруптар.
Чогум вентилятор өрээл иштин соотпас. Ону кондиционер ышкаш кылырда, ооң мурнунга доштуг саваны тургузар.
Ак чоорганны 10–15 минута соодукчунуң «морозилказынга» тургузупкаш, удуурда, шугланырга, сериин болур.
Бажыңга хүнде 1–2 катап шык арыглаашкынны кылыр. Шала болгаш мебельди хүнде оода бир катап аажок соок суг-биле аштап туруңар. Бажың иштинге тынарга чиик, агаарга доозун турбас.
Чүгле бажыңыңарны эвес, бодуңарны база сериидедиңер: соок суксуннардан ижиңер, салаттар болгаш соок закускалардан чиңер, мороженое-биле бодуңарны өөртүңер, соок душка чунуңар. Чүгле хөлүн эрттир сооттунуп болбас, вентилятор адаанга хөй олурарын шеглеңер.
"Шын" №52 2024 чылдың июль 13