Тывада муниципалдыг библиотекалар септелгези уламчылап турар, 2026 чылда Улуг-Хем кожууннуң төп уруглар библиотеказы, Чаа-Хөл кожууннуң төп уруглар библиотеказы, Таңды кожууннуң Кочетов көдээ библиотека салбыры, Өвүр кожууннуң Солчур көдээ библиотеказы база Тес-Хем кожууннуң Берт-Даг көдээ библиотека салбыры амгы үениң модельдиг библиотеказы эрге-байдалды алырлар.
Чурттуң культурлуг хүрээлеңин хөгжүдеринче болгаш аңгы-аңгы назы-харлыг кижилерни культурлуг үнелиг чүүлдерже хаара тудар сорулгалыг «Өг-бүле» национал төлевилелдиң «Өг-бүлениң үнелиг чүүлдери болгаш культура инфраструктуразы» деп федералдыг программазы ёзугаар библиотекаларның эде чаартылгазы 2025 чылдан чоруп турар.
Келир чылын улуг септелгелер эртер шупту албан черлеринде белеткел ажылдары эгелээн. Чижээлээрге, Берт-Даг көдээ библиотека эрги номнар фондузун үндүр бижип, септелгеге белеткенип эгелээн. Тыва Республиканың А.С. Пушкин аттыг национал библиотеказы библиотекаларда чаартылгаларны удуртуп, программаның бедик шынарлыг күүселдезин харыылаар төлевилел офизи болуп арткан.
Бо чылын Ак-Довуракта, Туранда, Тожу кожууннуң Доора-Хем суурда үш библиотека модельдиг библиотекалар кылдыр эде чаарттынган: амгы үениң септелгезин эрткен, чаа дериг-херекселдерни болгаш эт-септи салган, ном фондузу немешкен. Библиотекарьларның демдеглээни-биле алырга, чаартылгалар соонда уругларның-даа, улуг улустуң-даа албан черинче келири болгаш сонуургалы улгаткан.
«Культура албан черлери чаа тынышты ап, кандыг-даа назылыг кижилерни хаара тудар ёзулуг төптер болуп, аянныг дыштаныр черлер апарып, кижи бүрүзү бодунуң чаа арга-шинээн ажыдып, номчулганың илби-шидизин билип, чаа-чаа көрүштерни тыпкан» — деп, Тыва Республиканың Культура яамызы демдеглээн.
/ Бистиң корр.
Чурукту ТР-ниң Чазааның парлалга албанындан алган.
“Шын” №44 2025 чылдың ноябрь 13