Тываның агаар-бойдузу бо чайын кончуг изиг, чамдык черлерде каңдаашкынныг болган. Ынчангаш республикага мал чеминиң белеткелиниң эгелээри оът-сигенниң үнүжүнден хамааржыр.
Тываның тайгалар тыртым девискээрлеринде чайгаар үнер оът-сигенниң үнгени багай эвес. Ындыг черлерниң бирээзи Бии-Хем кожуун. Ынчангаш бии-хемчилер мал чеминге сиген белеткелин июль айның ортаа үезинде эгелей бергеннер. «Лидер-М» кызыгаарлаан харыысалгалыг ниитилел, В.К. Нурзаттың хууда тараачын-фермер ажыл-агыйы болгаш «Аян-Агро» кызыгаарлаан харыысалгалыг ниитилел чайгаар үнген сигенни мал чеминге кезип кирипкеннер. Эрткен неделяның төнчүзүнге чедир олар ниитизи-биле 138,8 тонна сигенни мал чеминге белеткеп алганнар.
Бии-Хем кожууннуң ажыл-агыйлары сиген кезилдезинче июль айның 20-ден ыңай хүннерде кирер деп турар.
Красноярск хоорайда статистика эргелелиниң медээлери ёзугаар алырга, чайгаар үнген сигенниг шөлдерден мал чеми белеткеп алырының талазы-биле Тыва Сибирь регионнарының аразында мурнуку черлерниң бирээзинде. Эрткен 2023 чылда Красноярск край — 145 муң тонна, Тыва – 125 муң тонна, Хакасия — 85 муң тонна сигенни мал чеминге белеткеп алган. Бир эвес Тываның агаар-бойдузу кожаларывыс Красноярск край болгаш Хакасияда ышкаш каңдаачал эвес турган болза, республиканың көдээ ажыл-ишчилери мал чемин кыштаглаашкын үезинде четчир кылдыр белеткеп алырының аргазы бар боор ийик.
Ш. СУВАҢ белеткээн.
Чурукту интернеттен хоолгалаан.
"Шын" №53 2024 чылдың июль 17
