Бирги классче билдириишкин

Өөредилге яамызының дыңнадып турары-биле алырга, бирги классче 6 хардан 8 хар чедир уругларны хүлээр. Ынчалза-даа ада-иениң билдириишкини-биле уругну оон эрте азы орай назы-хардан школаның удуртукчузунуң чөпшээрели-биле хүлээп болур. Кадыы кызыгаарлыг уругларны тускай өөредилге программазы-биле ада-иезиниң азы хоойлу ёзугаар төлээлериниң чөпшээрели-биле болгаш эмчи-психологтуг тускай комиссияның сүмези-биле 1-ги классче хүлээп алыр.

2023–2024 өөредилге чылында 6409 уругну 1-ги классче киирер дугайында Өөредилге яамызы дыңнадып турар. Школаже өөренип киирер дугайында билдириишкиннерни ийи чадага хүлээр. Бир дугаары – апрель 1-ден июнь 30-ге чедир чурттап турар девискээриниң аайы-биле документ ёзугаар киир бижидилгелиг ада-иелерниң билдириишкиннерин хүлээр. Чурттап турар бажыңының чоогунда школаның сайтызындан быжыглаттынганының болгаш 1-ги классче бижидилгениң дүрүмнериниң дугайын таныжып болур.

Бир дугаар ээлчегде чиигелделиг бөлүкке хамааржыр ада-иелерниң уругларын хүлээр. Хоойлу ёзугаар шериг албанныгларның болгаш янзы-бүрү албан черлериниң уруг-дарыын киирер. Оон ыңай кады төрээн улуг акызы азы угбазы ук школада өөренип турар уруглар бирги ээлчегже кирер уругларга хамааржыр. Интернаттыг школаларже прокурорлар, шииткекчилер болгаш истекчилерниң уругларын чиигелделиг бөлүк ёзугаар хүлээр.

Ийи дугаар чадада июль 6-дан сентябрь 5-ке чедир доктаамал киир бижидилгези чок хамаатыларның уругларын хүлээри көрдүнген. Школада хостуг олуттар илерээн таварылгада, ада-иелерниң билдириишкинин хүлээп алыр. Ук хуусаада кандыг-даа кызыгаарлаашкын чокка бүгү күзелдиг хамаатылар уругларын школаже киир бижидип болур.

Билдириишкиннерни үш аңгы хевирге киирип болур: школага ада-ие боду билдириишкинни бижиир, күрүне хандырылгаларының порталын (Госуслуги) болгаш Почта таварыштыр чагаа хевирлиг чорудуп болур.
Бир дугаар чадада бүгү киирген билдириишкиннерни чыгган түңнелинде, июль 3-тен эртелевейн, школа кирген дугайында дужаалдарны үндүрер. Ийи дугаар чадада билдириишкин харыызы 3 хонук эрткенде билдингир болур.

/ Бистиң корр.

"Шын" 2023 чылдың март 29 №22

#Шын #Тыва #Өөредилге #Школа #Биргикласс