Өвүр кожууннуң Хандагайты суурнуң школазында «Пифагор» деп бир дугаар муниципалдыг математиктиг өөредилге төвү ажыттынган. Республика Баштыңы Владислав Ховалыгның саналдааны «Эртемни – уругларга» губернатор төлевилелиниң ачызында ол боттанган. Республиканың Баштыңының 2025 чылда Дээди Хуралга (парламентиге) берген Айыткалында мергежилдиг специалистер белеткелинге кол базымны бээр эртем биле өөредилге чорудуун каттыштырары чугула дээрзин айыткан.
«Пифагор» төвү өөреникчилерниң математикага сонуургалын деткип, эртем шинчилелдерин көвүдедиринге таарымчалыг байдалды тургузар. Республиканың школа назыны четпээн уруглар албан черлеринден эгелээш, ортумак профессионал өөредилге черлеринге чедир ындыг төптерни шупту кожууннарга ажыдары планнаттынган. Эртемнерни хандыр өөрениринге эртем, технология, инженерия болгаш математиканы каттыштырганы аныяктарның билиглерже сонуургалын хандырар ужурлуг.
«Келир үениң инженер-технологтуг база бойдус талазы-биле эртемниг специалистерин белеткээри – республиканың кол сорулгазы. Бо хүнде регионнуң инновастыг хөгжүлдезинге ындыг кадрлар онза херек» - деп, республиканың Баштыңы «Пифагорнуң» ажыдыышкынын бодунуң блогунда демдеглээн.
Регионнуң Өөредилге яамызының дыңнатканы-биле алырга, Өвүр кожуунда ажыттынган төптүң ажылын күштелдирер дээш, башкылаашкынның чаа аргаларын ажылдап кылырынга идепкейлиг киржир ажылчын бөлүктү кожууннуң шыырак математика башкыларындан чыгган. Өвүр кожуунда школа назыны четпээн уругларны школаже кииреринге шыңгыы белеткээр «Бир – базым, ийи – базым» деп тускай иштики программаны база ажылдадыр.
«Пифагор» математиктиг өөредилге төвү аныяктарның угаан-медерел өзүлдезиниң ёзулуг шөлү апаарынга бүзүрелин илередип, салым-чаяанныг школачылар аңаа чүгле математиканы ханы өөренир эвес, а эртем-шинчилелдеринге идепкейлиг киржип, олимпиадаларга белеткенип, ол адырда боттарының салым-чаяанын улам сайзырадыр аргалыг апаар боор деп, Владислав Ховалыг бодунуң блогунда бижээн.
ТР-ниң Чазааның парлалга албаны.