Тыва Республиканың Дээди Хуралының дөрткү чыыжының бирги организастыг хуралы сентябрь 26-да болуп эртип, парламентиниң чаа составының ажылы эгелээн.
ТР-ниң Дээди Хуралының (парламентизиниң) дөрткү чыыжының бирги организастыг хуралының ажыдыышкынынга Тываның Баштыңы Владислав Ховалыг киришкен. Парламентиниң чаа чыыжының ажылы эгелээни-биле депутаттарга байырны Владислав Ховалыг чедирип, мурнуку чыыштың депутаттарынга, оларның үре-түңнелдиг ажылдааны дээш өөрүп четтиргенин илереткен. Хөй партиялыг парламентиниң ажылынга чедиишкиннерни күзеп, ооң ажыл-чорудулгазы Тываның социал-экономиктиг дүрген хөгжүлдезинге, чурттакчы чоннуң амыдырал-чуртталгазын улам экижидеринге улуг ужур-дузалыг болур ужурлуун демдеглээн.
Республиканың сөөлгү үеде төөгүзүнде хөй партиялыг парламент тургустунганы, ажылын эгелээни-биле холбаштыр Тываның чурттакчы чонунуң аңгы-аңгы үзел-бодалдарын дээди төлээлекчи орган дамчыштыр илередип болур хире ниитилел-политиктиг байдал тургустунган деп болур. Республиканың хөй национал чонун “Чаңгыс демниг Россия” политиктиг партия – 25 депутат, Россия Федерациязының Коммунистиг партиязы – 2 депутат, «Чаа кижилер» политиктиг партия – 1 депутат, Россияның либерал-демократтыг партия-зы – 1 депутат төлээлеп турар.
Тыва Республикада соңгукчуларның 80 ажыг хуузу сентябрь 8-тиң хүнүнде ТР-ниң Дээди Хуралының дөрткү чыыжының депутаттарының соңгулдаларынга “Чаңгыс демниг Россия” политиктиг партияны деткээн болгаш, бо партияның кежигүннери депутаттар парламентиде эң хөй. Оларның талалакчылары депутаттар-биле кады «Чаңгыс демниг Россия» партияның Дээди Хуралда фракциязы 28 кежигүннүг. Тыва парламентиниң шиитпирлер хүлээп алырынга бо фракция улуг салдарлыг боор.
Сентябрь 25-те «Чаңгыс демниг Россия» партияның фракциязының баштайгы организастыг хуралы болган. Фракцияның удуртукчузунга депутат Шолбан Күжүгет, ооң оралакчызынга Андрей Листков чажыт бадылаашкын-биле соңгуттурганнар.
Хөй партиялыг тыва парламентиниң сентябрь 26-да эрткен баштайгы организастыг хуралынга чаа чыыштың депутаттары Дээди Хуралдың ажылчын органнарының тургузуун тодарадып, парламентиде фракцияларның составын бадылаан. ТР-ниң Дээди Хуралы 9 комитеттиг, оларның чедизиниң удуртукчулары доктаамал үндезинге, ийи комитеттиң даргалары доктаамал эвес үндезинге ажылдаар.
ТР-ниң Дээди Хуралының Даргазынга Каң-оол Даваа, ооң оралакчызынга Андрей Листков депутаттарның хөй кезииниң бадылаашкыны-биле соңгуттурганнар.
Парламентиниң хоойлужудулга, күрүне тургузуу болгаш тус чер бот-башкарылга комитединиң даргазынга Людмила Осмоловская, экономика, саң-хөө-бюджет, үндүрүг политиказы, сайгарлыкчы чорук болгаш күрүне өнчүзүнүң талазы-биле комитеттиң даргазынга Андрей Листков, национал болгаш аныяктар политиказы, спорт, туризм болгаш эвээш санныг үндезин чоннарның херектериниң талазы-биле комитеттиң даргазынга Саян Ондар, инфраструктура хөгжүлдезиниң болгаш үлетпүр политиказының талазы-биле комитеттиң даргазынга Эрес Хуурак, кадык камгалалының, чурттакчы чонну ажылга хаара тударының болгаш социал политика комитединиң даргазынга Долаан Калбак, өөредилге, культура болгаш информастыг политика комитединиң даргазынга Белекмаа Мунге, айыыл чок чорук болгаш хоойлу-дүрүм талазы-биле комитеттиң даргазынга Аяс Санчат, аграр политика, чер өнчүзүнүң харылзаалары, бойдус камгалалы болгаш экология талазы-биле комитеттиң даргазынга Байбек Монгуш соңгуттурганнар.
Регионнар болгаш чурттар аразында харылзаалар талазы-биле комитетти, массалыг информация чепсектери болгаш хөй-ниити организациялар-биле кады ажылдажылга талазы-биле комитетти Роман Тамоев биле Ролан Ооржак олар тус-тузунда удуртурлар. Бо комитеттерниң даргалары доктаамал эвес үндезинге ажылдаар.
ТШО киржикчилерин болгаш оларның өг-бүлелериниң кежигүннерин деткиир талазы-биле комиссияны, Санажылга комиссиязын, Регламент болгаш депутат этиказының талазы-биле комиссияны, Тыва Республиканың Дээди Хуралының (парламентизиниң) депутаттарының орулгаларының, чарыгдалдарының, өнчүзүнүң болгаш өнчү-хөреңги талазы-биле хүлээлгелериниң дугайында берген медээлерин контрольдаар талазы-биле комиссияны тургускан.
Ш. МОҢГУШ.
Ада ТЮЛЮШТУҢ тырттырган чуруктары.
“Шын” №74 2024 чылдың сентябрь 28
