Төөгү эртемнериниң кандидады, Тываның күрүне университединиң Бүгү-ниитиниң төөгүзүнүң, археологиязының болгаш документилер-биле ажыл-чорудулга кафедразының доцентизи Елена Айыжы Хамааты эгелээшкиннер чөвүлелиниң чыыжынга таныштырган төлевилелдерни үнелээн.
Ылаңгыя “Чоннуң сүлдези” деп төлевилелди ол онзалап көрген. Ол дээрге кожууннарже үнүүшкүннерни кылып тургаш белеткээн, чоннуң сагыш-сеткилин, культуразын, өг-бүлениң ужур-дузазын бедидер сорулгалыг комплекстиг хемчеглер-дир дем демдеглээн. Өзүп олурар салгалдарны спорттуң национал хевирлери хүрешке, ча адарынга хаара тударын, уругларга болгаш аныяктарга национал оюннарны таныштырарын, чурттакчы чонга шажын өөредилгезин суртаалдаарын, Тываның чедиишкинниг спортчуларының болгаш культура ажылдакчыларының арга-дуржулгазын чижек кылдыр көргүзүп тургаш, сагыш-сеткил көдүрер ужуражылгаларны эрттирерин ында көрүп каанын ол чугаалаан.
“Салдынган сорулганы чедип алырда, дүрүм биле практиканы каттыштырган эгелээшкин ынчан чөптүг болур. – Чамдык эгелекчи саналдарга чигзинер-даа болзумза, Тыва культура төвүнүң төлевилелиниң боттанылгазынга, ылаңгыя методиктиг сүмелер болгаш дүрүмнер ажылдап кылырынга бодум хуумда күзелдиим-биле киржир мен. Янзы-бүрү угланыышкыннарның болгаш адырларның специалистериниң киржип турары-биле хемчег боду эки деп санаттынып турар. Хөй-ниитиниң берге айтырыгларын шиитпирлээринге идиглиг, шынап-ла, янзы-бүрү көрүштер бар-дыр” – деп, Елена Айыжы чугаалаан.
Бистиң корр.