Апрель 15-те Тываның Баштыңы Владислав Ховалыгның даалгазы болгаш Улусчу фронтунуң “Автопоезд” деп акциязы-биле тускай шериг операциязында киржип турар шериглеривисче чоруткан автомобильдер Абакандан чорупкан.
Улусчу фронтунуң регионалдыг күүсекчи комитединиң удуртукчузу Саима Далчинниң чугаалап турары-биле, Тывадан чорткан 40 машина-биле кады Хакасиядан 26 автомобильди база немей чоруткан.
“Бистиң автомобильдер апрель 29-та Москвага чеде бээр. Аңаа бүгү Россиядан чыгдынган техника чыглып кээрге, май 8-те чогуур черинче чедирер” – деп, Саима Далчин чугаалаан.
Чыгдынган автомобильдер чүгле 55-ки бригаданың шериглеринге эвес, а Чөөн шериг округунда 74-кү болгаш 11-ги шериг кезектеринге база баар дээрзин регионалдыг күүсекчи комитеттиң удуртукчузу Саима Далчин демдеглээн: “Дуза хереглээн Тываның шериглерин шуптузун хаара тударын оралдаштывыс”.
Ол ышкаш техниканы демир-орукче чүдүреринге дузалашкан автоволонтёрларга база өөрүп четтиргенин ол илереткен: “Автомашиналарны Хакасияга чедиреринге болгаш чүдүреринче белеткээринге дузалашкан бистиң автоволонтерларывыска өөрүп четтиргенивисти аңгы илередиксеп тур мен. Оон аңгыда, республиканың Орук болгаш транспорт яамызын база бистиң волонтерларывыска Хакасиядан Тываже дедир чанарынга автобусту бергени дээш, ол ышкаш Тываның чазааның автобаазазын демдеглексеп тур бис”.
