Республикага ооӊ мурнунда социал керээ чарып турган улустуӊ сайгарлыкчы ажылыныӊ салым-чолун Тываныӊ Чазаанга сайгарып көрүп турган. Күрүнениӊ деткимчези-биле сайгарлыкчы ажылды эгелеп, амыдыралын хандырып чурттай бээринге дузалаар сорулгалыг социал керээге хамаарыштыр тайылбыр ажылын күштелдирер дээрзин Тываныӊ Баштыӊы Владислав Ховалыг социал четкиде блогунга бижээн.
«Социал керээ талазы-биле ажылдыӊ системазын экижидер херек. Социал адыр болгаш экономика талазы-биле оон-даа хөй үре-түӊнелди чедип ап болур бис. Социал керээ чарып алгаш, бизнес ажыдып алыр күзелдиг улусту Тываныӊ Сайгарлакчы чорукту деткиир фонду өөредип белеткээр кылдыр дагзып кагдым. Бизнес-планны канчаар шын тургузарын билбес кижилер база турар. Оларны өөредир ужурлуг. Өг-бүлениӊ амыдыраар акша-хөреӊгизиниӊ четчир болуру төлевилелдиӊ экономиказындан хамааржып турар. Кожуун-сумуларда чазак-чагырга черлери бо ажылга идепкейлиг киржир ужурлуг.
Хамаатыларныӊ хереглеп турар чүүлдерин көрүп, шилип алганы сайгарлыкчы ажылыныӊ келир үеде кедилиг болур-болбазын, чонга херектиг азы херектиг эвезин, рынокка ажылдап шыдаар-шыдавазын болгаш өске-даа байдалдарны бүгү тала-биле сайгарып көөр. Оран-сава хөлезинин чиигедип бээр. Программага бодунуӊ чурттап турар кожуунун, суурун хөгжүдүп сайзырадыр күзел бодалдыг улустуӊ хөй болуру күзенчиг.
Социал керээ улустуӊ амыдырал байдалын экижидер талазы-биле күрүнениӊ эӊ-не күштүг чепсээ апарган. Ол ажыл-агый тып алырынга бергедежип турар улусту, хөй ажы-төлдүг өг-бүлени деткииринче угланган. 2020 чылдан тура социал керээни 14 муӊ кижи чарып алган. Олар мергежилдерге өөренип алган соонда, бот-хандырылгалыг хуу ажылдыг кижилер, сайгарлыкчылар апарган. Оларныӊ аразында бизнези элээн шуудай берген улус база бар.
Сорулгазын чедип шыдаар, чүткүлдүг, тура-соруктуг улуска чүгле сайгарлыкчы ажылды эгелеп алыр акша-хөреӊги херек турган. Олар боттарыныӊ салым-чаяанын азы кылып билир ажылын ажыглап тургаш, боттары акша ажылдап алыр дээрзинге бүзүрээр мен» — деп, регионнуӊ удуртукчузу Владислав Ховалыг тодараткан.
Р. Демчик белеткээн.
