Ол дугайында Улуг-Хемниң кожуун чагырыкчызының социал политика талазы-биле оралакчызы Михаил Даспак дыңнаткан:
— Чылдың-на “Социал хөмүр” деп губернатор төлевилели-биле ажылды кожуунда шыңгыы чорудуп турар бис. Чыл эгезинде хөй ажы-төлдүг болгаш амыдыраарынга чугула деңнелден куду орулгалыг өг-бүлелерниң документизиниң чыылдазын чорудуп эгелээн бис. Бо чылын 205 кижи билдириишкинни киирген. Эрткен чылга көөрде, беш кижи эвээжей берген болду. Баш бурунгаар бистиң санап турганывыс-биле алыр болза, социал деткимче алыр ужурлуг өг-бүлелерниң саны оон хөй болгу дег чүве. Ынчангаш келир чылын 240 өг-бүлеге социал хөмүрнү дүжүрер кылдыр планнап турар бис. Ол дээрге бир өг-бүлеге халас 2 тонна одаар хөмүр-дүр. Бо хүннерде Иштии-Хем, Арыг-Үзүү, Арыскан, Чодураа, Торгалыг, Ийи-Тал суурлардан 80 ажыг өг-бүлеге социал хөмүрнү дүжүрген.
Тускай шериг операциязының киржикчилериниң өг-бүлелеринге социал деткимчени ТР-ниң Күш-ажыл болгаш социал политика яамызын таварыштыр чорудуп турар бис. Бистиң кожуундан ТШО киржикчилери 80 ажыг кижи болуп турар. Кожуунувус мурнундан бо хүннерде одаар ыяшты дүжүрүп эгеледивис. Черле ынчаш социал деткимче алыр ужурлуг чонувуска шыдаар шаавыс-биле дузалап, ам-даа дузаны кадар бис.
К. Монгуш
Буян Ооржактың тырттырган чуруктары