2026 чылда Тывага бир дугаар төрүттүнген чаш хөй ажы-төлдүг өг-бүлениң 3 дугаар оглу болган. Ие кижиниң аас-кежии чыл эгезинде таваржы бергени канчаар-даа аажок улуг өөрүшкү болган.
Ол республиканың Перинаталдыг төвүнге 48 сантиметр узун дурттуг, 2752 грамм деңзилиг төрүттүнген. Аас-кежиктиг төлдүң бодунуң-даа, авазының-даа кадыкшылы эки, арга-дуржулгалыг эмчилерниң холунда.
Кира Бимба 10, 12 харлыг оолдарлыг дээрзин чугаалаан. Амгы үеде ооң өөнүң ээзи Тускай шериг операциязында киржип турар. Бичии оолдуң төрүттүнүп келгени өг-бүлеге канчаар-даа аажок өөрүшкүлүг болуушкун болган.
“Перинаталдыг төптүң эмчилеринге улуу-биле өөрүп четтирдим. Олар канчаар-даа аажок улуг дузаны чедирген. Хуусаамдан эрте чиигептеримден коргуп турдум. Ынчалза-даа олар мээң оглум чырык чер кырынга кадык болгаш чогуур үезинде төрүттүнүп келзин дээш, бүгү-ле аргаларны ажыглаан. Үш дугаар оглум кадык-шыырак төрүттүнүп келгенинге өөрүп тур мен” – деп, Кира Бимба сагыш-сеткили-биле үлешти.
Тываның Баштыңы Владислав Ховалыг бодунуң телеграм-каналында авашкыларга бодунуң байырын чедирген. Чылдың эгезинде бир дугаар оол уругнуң төрүттүнгени Ада-чурттуң камгалакчызының чылының демдээ болгаш республикага онзагай болуушкун дээрзин ол демдеглээн.
“Чыл эгезинде бир дугаар чаш оолдуң төрүтүнүп келгени Тиилелгениң 80 чылында база Ада-чурттуң камгалакчызының чылында кончуг чүүлдешкек болуп турар. Өг-бүлеге быжыг кадыкшылды, аас-кежикти, чаагай чорукту күзедим” – деп, ол чугаалаан.
Бистиң республикавыс чаш ажы-төлдүң хөй төрүттүнүп турарының талазы-биле Россияда тергиидеп турар. Республикада бир хонук дургузунда ниитизи-биле 9 кижи төрүттүнген. Оларның 7-зи оол, 2-зи кыс. Перинаталдыг төпте амгы үеде барык 40 хире сааттыг херээжен кижи бар.
“Демография талазы-биле байдалдың турум артканы өөрүнчүг-дүр. Ынчангаш аныяк өг-бүлелерни деткиири-биле бүгү чүүлдү кылып турар бис” – деп, Тываның Чазааның Даргазының оралакчызы Орлан Сарыглар демдемдеглээн.
Бистиң корр.
Буян Ооржактың тырттырган чуруктары
