«Бодунуӊ үезиниӊ маадыры» — шии мөөрейи

Тускай шериг операциязыныӊ киржикчилериниӊ дугайында шии мөөрейи болур дээрзин «Ада-чурт камгалакчыларыныӊ» фондузу биле Россияныӊ Шерииниӊ Төп академиктиг театры медеглээн.

ТШО-нуӊ хоочуннарыныӊ, волонтерларныӊ, эмчилерниӊ болгаш саниструкторларныӊ дугайында шиилер чогаадып, чаа регионнарда чоннуӊ чурттап эрткен төөгүзүн чугаалап бээрин сүмелеп турар.
«Бо хүннүӊ маадырлары дээрге чоокта чаа-ла уруг-дарыын азырап өстүрүп, анаа ажылдап чурттап чораан, эрес-дидим чорук кылырын бодавайн чораан бөдүүн кижилер-дир. Ынчалза-даа олар Төрээн чуртун, амыр-тайбыӊ чурттакчыларны камгалаар дээш дидими-биле чедип келген. Россияда ындыг кижилер дыка хөй. Оларныӊ маадырлыг чоруун чогаадыкчы уран чүүлге көргүзүп арттырып каар ужурлуг. Бүгү чурт оларныӊ дугайында билип алыр ужурлуг. «Бодунуӊ үезиниӊ маадыры» деп шии мөөрейиниӊ ылап сорулгазы ол-дур» – деп, Россияныӊ Маадыры, «Ада-чурт камгалакчылары» фондунуӊ Хайгаарал чөвүлелиниӊ кежигүнү Алексей Романов бодалын илереткен.
Төөгүге артып каар шии чогаадып тургузар кончуг эки арга берип турар дээрзин Россияныӊ Шерииниӊ Төп академиктиг театрыныӊ директору Милена Авимская демдеглээн.

«Ада-чурт камгалакчыларыныӊ» фондузу-биле кады чогаадыкчы ажыл-чорудулгавысты уламчылап тур бис. Тускай шериг операциязыныӊ маадырларыныӊ дугайында чугаалаары дээрге ниити хүлээлгевис-тир. Бистиӊ фронтучу бригадаларывыс мурнуку одуругларга барып четкеш, дайынчыларга шиилерни көргүзүп турар. Театрныӊ ТШО дугайында «Серая зона» деп тургускан шиизи улуг чедиишкинниг болган. Бо шии мөөрейинче арга-дуржулгалыг-даа, чаа эгелеп чоруур-даа чогаалчыларны чалап турар бис. Чуртувустуӊ төөгүзүнүӊ бир кезээ болур шии чогаадып тургузар идегелдиг арга ол-дур – деп, Милена Авимская чугаалаан.

Эӊ-не эки шиилерни шилип алгаш, «Маадырларныӊ үези» режиссер лабораториязынга тургускаш, Россияныӊ Шериг театрыныӊ сценазынга көргүзер. Шиилер чыындызын ном кылдыр үндүргеш, чурттуӊ театрларынга сүмелээр.

Мөөрейниӊ темазынга дүгжүп турар ажылдарны шилиир. Шииниӊ хемчээли 40 арын болур. Чогаалдыӊ кол ужур-утказын, маадырларын, сюжедин, чөрүлдээзин тодаргай бижиир. Ажылдарны 2025 чылдыӊ январь 30-ге чедир хүлээр. Чорудар электроннуг адрези: teatr.armii@yandex.ru «Конкурс «Герой своего времени» деп айтып каар дээрзин «Ада-чурт камгалакчыларыныӊ» фондузунуӊ регионалдыг салбыры дыӊнадып турар.

Р. Демчик очулдурган.