Бок үндүр сөөрткени болгаш электри энергиязының өртээн төлээриниң онлайн-квитанциялары төлекчилерниң телефоннарында февраль айның сөөлгү хүннеринде кирип келгеш, чамдык кижилерни шуут аңгададып, харын-даа аамайладыпкан. Ийи аңгы ачы-дузаны чүге чаңгыс квитанция-биле төлээр деп чүве хөй кижилерни кайгадыпкан.
А ол дээрге бок үндүр сөөрткени болгаш электри энергиязының өртээн төлээриниң чаа системазы ажылдап эгелээни ол чүве-дир оң. «Россети Сибирь Тываэнерго» компания биле «Транспорт сервизи болгаш төлевилели» күрүнениң унитарлыг бүдүрүлгениң удуртулгалары ачы-дуза төлевирин республиканың чурттакчы чонундан ындыг арга-биле төледип алыр деп шиитпирлээн. «Россети Сибирь Тываэнерго» компанияның директору Антон Лукин биле «Транспорт сервизи болгаш төлевилели» күрүнениң унитарлыг бүдүрүлгениң удуртукчузу Олеко Намчин оларның массалыг информация чепсектериниң ажылдакчыларынга дыңнатканы-биле алырга, «Россети Сибирь Тываэнерго» компанияның бо чылдың февраль айдан эгелеп, кадыг коммуналдыг бокту үндүр сөөрткени дээш төлевирни санап үндүрүп, чыып кирипкен. Бок үндүр сөөрткени болгаш электри энергиязының өртээн төлээриниң чаа системазы ёзугаар квитанцияларга чүгле электри энергиязының өртээн эвес, а бокту үндүр сөөрткениниң өртээн база айтып каар.
Антон Лукинниң дыңнатканы-биле алырга, бок үндүр сөөрткени болгаш электри энергиязының өртээн “чаңгыс соңгага” төлээриниң чаа системазы чурттуң өске регионнарында бодун эки кылдыр көргүскен. Бир эвес Тываның чурттакчыларының талазындан чаа чүүлге хамаарыштыр айтырыглар тыптып кээр болза, «Россети Сибирь Тываэнерго» компания биле «Транспорт сервизи болгаш төлевилели» күрүнениң унитарлыг бүдүрүлгениң офистеринден тайылбырны ап болур.
Бир эвес кайы-бир хамааты бок үндүр сөөрткен өртээн төлевейн баар болза, ооң бажыңын электри энергиязы-биле хандырарын соксатпас. Ылап-ла ындыг боору чоорту көстү бээр.
«Транспорт сервизи болгаш төлевилели» күрүнениң унитарлыг бүдүрүлге ачы-дуза төлевирин чыырын чүге «Россети Сибирь Тываэнерго» компанияга дамчыдып берип турарыл? Чигзинчиг айтырыг де! Боду чыып шыдавас апарган бе?
Бок үндүр сөөрткени болгаш электри энергиязының өртээн “чаңгыс соңгага” төлээриниң чаа системазының саазын квитанцияларын март айның баштайгы хүннеринде тарадып эгелей бээр.
Ш. МОҢГУШ.
“Шын” №8 2025 чылдың март 6