Тываның Чуртталга-коммунал ажыл-агый яамызы регионалдыг оператор “Транспорт сервизи болгаш төлевилел” КУБ-ка 5 чаа бок сөөртүр техниканы дамчыдып берген. Ол боктуң хемчээлин эвээжедир күштүг базыышкынныг таптай базыптар тускай херексел-биле дериттинген бок үндүр сөөртүрүнге кончуг ажыктыг техника.
Бо дериг-херекселди бок үндүр сөөртүр хемчеглерге кызыгаарланып саткан дээрзин ТР-ниң чуртталга-коммунал ажыл-агый сайыды Мерген Дагба демдеглээн. Техника аймаа чедишпес болганындан, Тываның Баштыңының даалгазы-биле ук техниканы бүдүрүп турар черлерден дорт садыглажыышкынны эгелээн. Республикага ниитизи-биле 84 бок төгер машина херек. Оон аңгыда хууда бок чүдүрүкчүлерин база хаара тудары чугула.
Амгы үеде 5 бок сөөртүр машина келген, а май төнчүзүнде ам-даа 13 техниканы манап турар. Амгы үеде регионалдыг оператор “Транспорт сервизи болгаш төлевилел” КУБ-та 32 бок сөөртүр техника бар. Чаа бок төгер машина бүрүзүнүң кузовунуң хемчээли 22 куб метр, өскээр чугаалаарга, 8 бункер бок кире бээр. Тывада шупту 600 хире бункер бар.
“Чурттакчы чонга машина эртип чыткаш, бокту чыып алыр чаа арганы саналдаан бис. Хову-Аксында бо арганы тус черниң чазак-чагырга органнары-биле неделяда бир катап бокту чыыр чурумну тургускаш, ажыглап эгелей берген” – деп, сайыт чугаалаан.
Бо чылын 21 тускай техниканы, ооң иштинде бок сөөртүрлерни, садары планнаттынган. Ол ышкаш Кызыл кожуунга бок болбаазырадыр комплекс тудуунуң төлевилел-сметалыг документациязының ажылы чоруп турар. Бир эвес шупту чадаларны камгалап аптар болза, 2026 чылда ук комплекс ажылдап эгелей бээр. Чедери берге – Мөңгүн-Тайга, Тере-Хөл, Тожу кожууннар бедик температуралыг бок өрттедир херекселдерни алыр.
Бистиң корр.
Чуруктарны ТМГ-ден алган.
«Шын» №15 2025 чылдың апрель 24
