Кызыл хоорайда чидиг айтырыгларның бирээзи – бок айтырыы. Чамдык черлерде бок чыткан ояар чыдар, а бир чамдык черлер үргүлчү арыг-даа боор. Ооң чылдагааны чүдел? Бо айтырыгга база «Чаагайжыдылга» муниципалдыг бюджеттиг албан чериниң ажыл-чорудулгазының дугайында ооң директору Болат Даваа-биле чугаалаштывыс.
– «Чаагайжыдылга» албан чериниң ажыл-чорудулгазын таныштырыптар силер бе, Болат Игоревич.
– Ооң мурнунда «Чаагайжыдылга» МУБ (муниципалдыг унитарлыг бүдүрүлге чери) турган болза, ам муниципалдыг бюджеттиг албан чери кылдыр эде адаан. Документ-саавырда эдилгелер амгы үеде чоруп турар. Эрги организациявыска 290 ажыг кижи ажылдап турдувус. Оларның аразында бок аштакчылары, чолаачылар, сантехниктер, слесарьлар дээш кандыг-даа ажылчыннар бар. Бо чылдың июнь 1-ге чедир документ-саавыр доозулган турар ужурлуг деп санап турар бис. Ам чаа тургустунуп турар организацияны 332 ажылчын олуттуг кылдыр чагыгны киирдивис. Организацияда ниитизи-биле 77 бок аштаар, чүдүрер техника бар. 100 ажыг бок аштаар ажылчын бар. Кызыл хоорайга 100-тен хөй 300 ажыг кижи бок аштаар болза, ынчан ажылга четтигер боор оң. Бюджет эвээш болганындан бок аштакчыларының санын көвүдедип шыдавайн турар-дыр бис ийин.
– Силерниң организация кайы девискээрлерни арыглап турар ирги?
– Кызыл хоорайда «Семейный», «Молодежный», «Эмчилер аллеязы» дээн ышкаш 15 сесерликти, чадаг кижи кылаштаар тротуарларны, доктаамнарны, доктаамнарда бок октаар саваларның богун аштап-арыглап турар бис. А хөй квартиралыг бажыңнар девискээринде бок октаар контейнерлер чоогун ук бажыңнарда быжыглаттынган башкарылга компаниялары арыглаар хүлээлгелиг.
Сөөлгү үеде «Мобильдиг бригадалар» тургузуп алгаш, чамдык кымга-даа хамаарышпас черлерни аштап эгелээн бис. Ол дээрге дежурныйлаашкын-дыр ийин. Бок аштаар ажылчыннарывыс неделяда бир катап «Мобильдиг бригадага» дежурныйлаар, а арткан үеде бодунуң хүлээнген девискээриниң богун аштаар.
– Бок ашталгазындан аңгыда, чүнү кылып турар силер?
– Бистиң ажылывыска чүгле бок аштаары эвес, а хоорайның ногаанчыдылгазы база хамааржып турар. Чайгы үеде кудумчуларда чечектерни тарыыр, суггарар, таарар, чараштаар, а кыжын хар аштаар дээн ышкаш ажылдарывыс база бар.
– Бичии уруглар ойнаар шөлчүгештер кымга хамааржыр?
– Ук шөлчүгештерни кандыг-ла-бир өске программа дузазы-биле кылып турар. Немей төлээр акшазы чок боорга, башкарыкчы компаниялар бичии уруглар ойнаар шөлчүгештерни алыксавас болур. Хүлээнип ап турар компаниялар база бар. Чамдык бажыңнарның башкарыкчы компаниялары бажыңның девискээрин бүрүнү-биле ап алган боор чорду. Ук бажыңнарның чурттакчылары ону сүржүп тургаш чедип алган болур. Бир эвес хөй квартиралыг бажыңнарның чурттакчылары чурттап турар чериниң чаагайжыдылгазы, арыг-силии дээш туржур болза, чүнү-даа чедип ап болур.
– Улуг ногаан бункерлерни кайы организация харыылап турар?
– Ону регионалдыг оператор харыылаар. Ол организацияның бункерлери-дир. Бажыңының девискээри боктуг дээш хомудал киирип турар хамаатыларның кичээнгейнге! Чурттап турар бажыңыңар бир-ле башкарыкчы компанияда быжыглаттынган турар ужурлуг. Бок дээш акшаны ай санында төлеп турар болганыңарда, ук компанияже бок дугайында хомудалыңарны киирип, негелдени кылыр эргелиг силер.
– Хоорай иштинде кургап, кадып калган ыяштарның хемчээн кымнар ап турар?
– Бок апарган ыяштарны бистиң организацияга чагыг киирип каарга, 3 хире метрге чедир бедик ыяштарны арыглап болур бис. Оон бедик ыяштар арыглаар техника бисте чок.
Түңнел сөс: Сөөлгү үеде, ылаңгыя бо чазын, найысылалдың арыг-силиг апарганын эскерип болур. «Чаагайжыдылганың» ажылдакчыларының эки ажылын демдеглээр апаар. Ынчалза-даа хөй квартиралыг чамдык бажыңнарның девискээрлеринде боктуг черлер ам-даа бар, ол шын. Ынчап кээрге бок айтырыын чаңгыс организация эвес, аңгы-аңгы албан черлери харыылаар дээрзин билип алдывыс. Бок айтырыы азы арыг-силиг чорук чүгле коммунал ажыл- агый организацияларындан эвес, а кижи бүрүзүнүң бодунуң чурттап турар девискээринге хамаарылгазындан база хамааржыр дээрзи билдингир.
Бир эвес чурттап турар бажыңыңарның чоогунда ногаан бункер дола берген, ону кым-даа арыглавайн турар болза, Регионалдыг оператор деп ТСП-же 8 (39422) 5-39-10, 8 (39422) 2-30-36 дугаарларже долгаар. А бир эвес бажың чоогунда бичии контейнерлерниң богу ажып төктүп эгелезе, ук бажыңның башкарыкчы компаниязынче хомудал киирер силер. Хөй-ниити чериниң богу дээш, «Чаагайжыдылга» муниципалдыг бюджеттиг албан чери харыылаар дээрзин сагындыраал.
Айдың ОНДАР чугаалашкан.
Чуруктарны интернет четкизинден алган.
«Шын» №35 2024 чылдың май 15
