Парлалга конференциязы
ТР-ниң Күш-ажыл болгаш социал политика яамызынга парлалга конференциязы болуп эрткен. Аңаа ТР-ниң күш-ажыл болгаш социал политика сайыды Эдуард Сандан болгаш Республиканың 1 дугаар эмнелгезиниң кадрлар даргазы Шеңне Салчак, «Воскток» КХН-ниң кадрлар даргазы Лариса Уюсова болгаш өскелер-даа киришкеш, массалыг информация чепсектериниң төлээлериниң сонуургааны айтырыгларга харыыларны берген.
Конференцияның кол темазы ажылчын олуттар ярмарказы болган. Ярмарканың кол организакчызы регионнуң Күш-ажыл болгаш социал политика яамызы. Хемчегге ажылчыннар дилеп турар организациялар болгаш бүдүрүлгелерниң төлээлери киржир. Ажыл дилеп турар чон аңаа келгеш, кайы организацияда кандыг ажыл барын билип алгаш, ол-ла дораан ажылга тургустунуп ап болур аргалыг.
“Суугу”, “Оникс”, “Өлчей”, “Строй-Экспресс” кызыгаарлаан харыысалгалыг ниитилелдер дээн ышкаш ажылчыннар хереглеп турар тудуг компаниялары база Тыва Республиканың Саң-хөө, Кадык камгалал яамылары, Кызыл хоорайның мэриязының өөредилге талазы-биле департаментизи, Тыва Республиканың Алдан-Маадыр аттыг национал музейи, «Тываавтотранс» транспорт компаниязы, "Россети Сибирь Тываэнерго" АН, Россияның федералдыг айыыл чок албанының Тыва Республикада Кызыгаар эргелели, Республиканың перинаталдыг төвү болгаш өске-даа хөй организациялар кээп киржир.
«Ажылчын олуттар ярмарказы Россия девискээринде ийи дугаар чыл эртери бо. Бо хемчег ийи чадалыг. Бирги чадазы – апрель 18-те, ийиги федералдыг чадазы чайын болур. Кол сорулгавыс – ажыл чок хамаатыларның санын эвээжедири.
Ынчангаш апрель 18-те, Кызыл хоорайның төвүнде Аныяктар өргээзинге, ажылчын олуттар ярмарказынче ажыл дилеп турар чонну кыйгырып тур бис. Бир дугаар шөлчүгешке Чонну ажылга хаара тудар төптүң специалистери болгаш аңгы-аңгы организацияларның кадрлар килдистериниң даргалары чонну хүлээп, консультацияларны бээр. Ийи дугаар шөлчүгешке социал керээ күрүне деткимчезиниң ачызында бодун боду ажылга хаара тудуп, бир-ле продукция бүдүрүп турар хамаатыларның бараанының делгелгези болур. Оон ыңай «Ада-чурт камгалакчылары» күрүне фондузу, эмчилер, аңгы-аңгы банкыларның специалистери чоннуң сонуургаан айтырыгларынга харыыларны бээр. База бир солун шөлчүгешке ортумак болгаш дээди өөредилге черлериниң төлээлери турар. Бо чылгы ярмаркага 303 ажыл берикчизи киржир. Эрткен чылын 223 турган. Аңаа 1000 ажыг ажылчын олуттар киришкен болза, бо чылын 1700 ажыг хостуг олуттар турар. Кожуун төптеринге база шак-ла мындыг ярмаркаларны организастаары планда көрдүнген» – деп, Эдуард Сандан чугаалады.
Парлалга конференциязынга келген ажыл берикчилериниң чугаалааны-биле алырга, эрткен чылын болган ярмарка үезинде ажылче хүлээп алган хамаатылар бо хүнге чедир ажылдап турар. Ажылчын олуттар ярмарка- зы – ажыл берикчилеринге-даа, ажыл дилеп турар хамаатыларга-даа болчаг чери болуп, кайы-даа талага эптиг байдалдарны тургузуп турар хемчег. Ажыл дилеп турар чонну апрель 18-те Кызыл хоорайда Аныяктар өргээзинге болур ажылчын олуттар ярмарказынче чалап тур!
Арынны Айдың ОНДАР белеткээн.
Буян ООРЖАКТЫҢ тырттырган чуруу.
“Шын” №14 2025 чылдың апрель 17
