Школаларга капиталдыг септелге чорудар федералдыг программаның Тывада боттанылгазы уламчылап турар.
Чоокта чаа ТР-ниң Баштыңы Владислав Ховалыг бо өөредилге чылының төнчүзүнде, апрель айда, регионнуң алды школазынга капиталдыг септелге эгелээр дээрзин медеглээн. Ол дээрге Кызыл кожууннуң Сукпак суурунда Борбак-оол Араптан аттыг школа, Чеди-Хөл кожууннуң төвү Хову-Аксында, Тес-Хемниң Чыргалаңдыда, Сүт-Хөл кожууннуң Бора-Тайга сумузунда, Барыын-Хемчиктиң Аксы-Барлык база Бай-Тайга кожууннуң Кызыл-Даг суурунда школалар-дыр.
Сүт-Хөл кожуунче ажыл-агыйжы сургакчылаашкын үезинде Бора-Тайга ортумак школазының капиталдыг септелгезиниң кайы хире чоруп турарын көрүп четтивис.
Бора-Тайга ортумак школазының директорунуң хүлээлгезин күүседип турар Ай-Кыс Ховалыгның медеглээни-биле алырга, 11 класс доозар ортумак школада ниитизи-биле 96 уруг өөренип турар. 28 аңгы-аңгы эртемнерниң башкылары болгаш 27 техниктиг ажылчыннар хаара туттунган.
«Аныяктар болгаш уруглар» деп национал төлевилелдиң деткимчези-биле 2025 чылда Бора-Тайга ортумак школазынга капиталдыг септелге көрдүнген. Школага септелгелер чоруп турар үеде уругларның өөредилгези эге класстар өөренир оран-савада уламчылап турар. Эге класстарны изиг чем-биле хандырар ажыл өөредилге чылы доозулгужеге чедир уламчылаар» – деп, Ай-кыс Ховалыг чугаалады.
«Депшилге» тудуг организациязы Бора-Тайга ортумак школазының капиталдыг септелгезин хүлээнген. Бо үеде ажылдың улуг кезии кылдынган. Дөрт аңгы черден бригадалар ажылдап турар. Чаа-Хөлден, Чадаанадан, Кызыл хоорайдан, Эрзинден болгаш тус черниң тудугжулары ниитизи-биле 40 ажыг кижи ажылда хаара туттунган. Оран-саваның дээвиири бүрүнү-биле солуттунган. Сантехниктерниң ажылының чартыы кылдынган. Ажыл ниитизи-биле кончуг шалыпкын чоруп турар. Изиг-соок суглуг, чаагайжыды туттунган, өөрениринге таарымчалыг школа удавас белен болур дээрзи чугаажок.
«Ооң мурнунда Сүт-Хөл кожууннуң социал төвүнге повар болуп ажылдап чораан мен. Дооскан эртемим-даа повар. Үш ажы-төлүмнүң улуглары школаны дооскаш, Москва хоорайда ажылдап-чурттап чоруур. А хеймеривис бо школада өөренип турар. Ажы-төлүмнүң школазын чараштап, чаартып турары өөрүнчүг-дүр. Ынчангаш тудугга сеткилимден дузалажыксааш, чем кылгаш, ажылдап турар оолдарның хырнын тоттуруптар болзумза, улуг буян-дыр дээш ажылдап тур мен. Меңээ дузалажып турар эжимни Оляна Сарыглар дээр. Иелээн суугуга от салгаш, чем кылып тур бис. Хүнде үш катап изиг чемни тудугжулар чип турар. Дүъште бир дугаар, ийи дугаар-биле чемгерип тур бис» – деп, Ульяна Моңгуш чугаалады.
Шынап-ла, ажыл кончуг шалыпкын чоруп турар болду. 2025–2026 өөредилге чылында уруглар чаарттынган школага өөренип эгелээр дээрзи билдингир. Бора-тайгажыларга улуг белек – чаарттынган школа болган-дыр.
Айдың ОНДАР.
Буян ООРЖАКТЫҢ тырттырган чуруу.
«Шын» №15 2025 чылдың апрель 24
