Сөзү Олег Сувакпиттии. Аялгазы Самбың-оол Суваңныы.
Аразында сүмележип,
Аъттыг чортуп чораанывыс,
Амыдырап-чурттап ханмас
Ак-ла-Дуруг, Кара-Дуруг.
Ажык баткан шыктарында
Арбын сүрүг чапты берген,
Аалдар, өглер сериин чайлаа
Ак-ла-Хемим, Чаш-ла-Талды!
Чиңгир ногаан салам тараа
Чиндиңнедир чалгып чыдар,
Дээскиндир карак четпес
Терезинни, Аймыырлыгны.
Калбак, делгем шынаа-шөлдү
Кайыын тура харап чыдар,
Ханаланган,бедиктенген
Казанактар, Шаараштар.
Эргип четпес, сеткил ханмас
Элбек улуг чуртумайга
Ээп өскен авам ышкаш,
Эргелиг мен, чассыг-ла мен.
“Шын” №8 2026 чылдың март 5