Ипотека, өөредилге болгаш автокредиттерден аңгыда, хереглел кредиттерин болгаш чээлилерни алырын Россияның хамаатылары бо чылдың март 1-ден боттары хоруп каап болур. Ол дээрге хамааты ындыг хоругдалды тургускан соонда, ол боду-даа, бузурукчулар-даа хереглел кредиттерин болгаш чээлилерни ап шыдавазы-дыр. Мындыг арга-биле хамааты бузурукчуларның үүлгедиглеринден бодун боду камгалааны ол-дур.
Бир эвес хамааты кредит азы чээли алыр дээнде, ол хоругну хамааты боду соксадып каап болур. Хоруурун болгаш ону соксадырын кайызын-даа чүгле Күрүне ачы-дуза порталын (Госуслуги) дамчыштыр чорудуп болур.
Бирги базым. Херек ачы-дузаны шилип алыры
“Госуслуги” порталда хууда кабинетче киргеш, “Штрафы и налоги” кезекти тып алыр. Экранның солагай талазында ачы-дуза аразындан “Установление запрета на получение кредита” бижимелди тып алыр. Ажыттынып келген соңгада “Начать” деп бижимелди базыптар.
Ийиги базым. Хууда медээлерни хынаары
“Госуслуги” силерниң хууда медээлериңерни боду-ла көргүзүптер – адыңар долузу-биле, төрүттүнген хүнүңер, паспортуңарда медээлер болгаш ИНН. Оларны ыяап хынаар. Кончуг херек болза, чаартылганы бодуңар киириңер азы солуңар.
Үшкү базым. Хоруурунуң хевирин шилип алыры.
Кандыг кредит азы чээли хевирин хоруурун шилип алыр. Ол долузу-биле хоруур азы чамдыызын хоруур-даа бооп болур.
Долузу-биле хорууру дээрге кандыг-даа кредитти албазы. Чамдыызын хоруур дээрге кайы кредиттерни алырын шилип алыры.
Чүгле банкылардан болгаш микро саң-хөө организацияларындан кредит алырын хоруп каар.
Офиске бодунуң хууда киржилгези чокка (Интернет азы телефон дамчыштыр) азы өске арга-биле (боду офиске кээри, Интернет азы телефон дамчыштыр) кредиттер алырын хоруур.
Дөрткү базым. Кредит алырын боду хораан дугайында билдириишкинни киирер
Ачы-дуза чедирериниң эптиг аргазы-биле билдириишкинге холунуң үжүүн салгаш, чорудуптар. Хоругну кииреринге электроннуг хол үжүүнүң кандыг-даа хевири тааржыр.
Билдириишкинни алган дугайында медээ силерниң хууда кабинедиңерге 2 хүн дургузунда кээр ужурлуг. Дараазында хүнде кредит алырын хорааны күштүг апаар.
Бир эвес херек апарза, ону “Штрафы и налоги” кезекте “Снятие запрета на получение кредита” ачы-дузазы-биле соксадып каап болур.
Кредиттер алырын чамдыызын соксадып болбас, хоругну чүгле долузу-биле соксадыр апаар. Бир эвес кредит алырын бөдүүн электроннуг хол үжүү-биле кылган болза, кайы хоругну соксадырын шилип алыр:
Күштелдирген квалификастыг эвес электроннуг хол үжүү (УНЭП) “Госключ” капсырылгада.
Күштелдирген квалификастыг электроннуг хол үжүү (УКЭП) “Госключ” капсырылгада.
Күштелдирген квалификастыг электроннуг хол үжүү (УКЭП) “Госключ” компьютерден.
Үстүнде айыттынган хол үжүктериниң кайызы-даа чок болза, баштайгызын ажыглааны дээре. Ону ажыглаарда, Күрүне ачы-дузазында бижимелдеринде бадыткаттынган медээлер, хууда кабинетте СНИЛС-тиң медээлери, ол ышкаш бижимелдерде бадыткаттынган медээлерге кошкан телефоннуң дугаары херек.
РФ-тиң Сан-чурагайлыг хөгжүлде яамызының медээлеринден.
Чурукту интернет четкизинден хоолгалаан.
«Шын» №9 2025 чылдың март 13