Чагытай хөлдүң эриинде Тываның күрүне университединиң «Буревестник» деп спортчу кадыкшылга лагеринге эң-не идепкейжи 20 студентиниң дыштанылгазын студентилерниң профэвилел организациязы эрттирген.
Университеттиң студентилеринге спортчу кадыкшылга лагери чаңчыл езугаар дыштанылга зоназы болуп турар. Бо чылын 20 студент аңаа дыштаныр аас-кежиктиг болган. Олар бүдүн чыл дургузунда университеттиң студентилер активиниң ажылынга идепкейлиг киришкеннер. Ол дээрге аңгы-аңгы дээди өөредилге черлериниң аныяктар эвилелдериниң даргалары болгаш төлээлери, студентилер отрядтарының командирлери, чогаадыкчы ансамбльдерниң киржикчилери-дир.
Чайгы дыштанылганың программазында эртенги сула шимчээшкин, спортчу болгаш чогаадыкчы оюннар, квестер болгаш дискотекалар бар. Уруглар хүннүң-не «Чагытай» хөлге эштип, чурукка тырттыржып, хөглүг дыштанып турарлар. Дыштанылга үезинде психологтуг тренингилер болгаш мастер-класстар оларга эң-не солун болган.
«Чылдың он айында бис, студентилер, эртем-билиг чедип алыр дээш, кызып өөренип турар бис. Хүннүң-не лекциялар болгаш семинарлар, кежээлерде конспектилер, белеткелдер болгай. А чайгы дыштанылга бистиң эң-не манаарывыс изиг күзеливис-тир. Университедивис бисти дыштандырып, сагыш салып турар-дыр. Ол чүүл бистиң хей-аъдывысты оттуруп, сорук киирип турар» — деп, «Капелька» деп экологтуг отрядтың командири Ачыты Сюрюнот өөрүшкүзүн илереткен.
ТывКУ-нуң парлалга албанының медээзинден.
"Шын" №55, 2023 чылдың июль 26