Кызылда “Сүбедей” спорт ордузунга август 22-24 хүннеринде “Мажалык” командазының 30 чылынга тураскааткан эр ойнакчылар аразынга биче бут бөмбүүнге солун, көрүштүг маргылдаа болуп эрткен. Аңаа ниитизи-биле шыырак дээн 17 команда киришкен. Маргылдааның кол сорулгазы – Россия чемпионадынга киржир тиилекчи команданы илередири.
Ойнакчыларны деткиири-биле “Мажалык” клувунуң удуртулгазы база деткикчилери 350 муң рубль түңнүг акшаны шаңналдарга тускайлап берген.
Маргылдааның ажыдыышкынынга сенатор Шолбан Күжүгет киржип, республикага бут бөмбүү спорту сайзырадырынга улуг үлүг- хуузун киирген “Мажалык” команданың хоочуннарынга изиг байырны чедирип, ойнакчыларга спортчу чедиишкиннерни күзээн.
Үш хүн иштинде уламчылаан чидиг оюннарның түңнелинде тулган тиилекчи команданы илередири-биле эрткен чылгы чемпион, Онза байдалдар яамызының командазы биле аныяктардан тургустунган “ Азия төвү” команда ужурашканнар.
Ачыр-дачыр оюн соонда Онза байдалдар яамызының дуржулгалыг, тиилелгеже чүткүлдүг ойнакчылары удурланыкчыларын 3 : 2 санга уткаш, 1-ги черге төлептиг болганнар. 2 дугаар черни “Азия төвү”, 3 дугаар черни “Мажалык” командалары алганнар.
Тускай шаңналдарны онзагай оюннуг спортчуларга тывыскан. Тергиин ойнакчы Мирослав Монгуш (ОБЯ), тергиин халдакчы Менги Хомушку (Мажалык-ОПТИ), тергиин вратарь Айдыс Монгуш (Сибирь) олар болганнар. Шаңнал-макталдарны тергиин ойнакчыларга тус-тузунда тывыскан. Тиилекчи команда Кубок, медаль, диплом, 200 муң рубль акшаның сертификадын шаңналга алган. 2-3 дугаар черлерни чаалап алган командаларга кубоктар, медальдар, дипломнар база 70 – 50 муң рубль акшаның сертификаттарын тывыскан.
Ай-Херелдиң тиилелгези
Самбонуң дайынчы хевиринге делегей чергелиг Гран-при турнири Петропавловск-Камчатск хоорайга август 23-те болуп эрткен.
Бо маргылдаага бистиң чаңгыс чер чурттуувус Ай-Херел Хертек Новосибирск хоорайның төлээзи чергелиг киришкен. 58 килге түңнел хүрешке Ай-Херел Казаньдан Сергей Овчинниковту боой тудар арга-биле тиилээш, чемпионнаан.
Бистиң чаңгыс чер чурттуувус делегей чергелиг маргылдаага тергиидеп, чемпион атты чаалап алганы Тывага база чоргаарал.
Алексей Чамбал-оол, спорттуң хоочуну.
Чуруктарны интернеттен хоолгалаан.
2025 чылдың август 28 “Шын” №33