Февраль 8-те Тыва үндезин культура төвүнге Ирина Романова аттыг “Тываның буянныг чүректери” мөөрейниң тиилекчилерин шаңнаар бир дугаар байырлыг ёзулал болган. Ол өөредилге, кадык камгалалы, спорт, культура, волонтёрлар болгаш социал адырда кадыы кызыгаарлыг кижилерге дузалажып чоруур эң-не тергиин специалистерни илередиринче угланган.
Бо мөөрей кадыы кызыгаарлыг кижилерге дузалажып турар бүгү-ле кижилерни илередир дээрзин мөөрейниң тургузукчузу РФ-тиң сенатору Дина Оюн демдеглээн: “Ол дээрге кадык камгалалы, өөредилге, социал болгаш өске-даа аңгы-аңгы адырларда ажылдап чоруур кижилер-дир. Оон аңгыда, тиилекчилер аразында кол дузалакчылар деп адаар меценаттар база бар”.
Дина Оюннуң чугаалааны-биле алырга, мөөрейге киржири-биле 77 чагыгны киирген. Оларның аразында эң-не хөйү өөредилге адырында кадыы кызыгаарлыг уруглар өөредип турар школалардан болган.
“Тиилекчилерниң чүткүлү республиканың өске-даа чурттакчыларынга салдарлыг болурунга идегеп турар бис. Амгы үеде бистиң ниитилеливис бот-боттарывыска дузалажыры чугула дээрзин кайы хире билип турарывыс-биле күштүг. Шак ол дузаны, бир дугаарында, ёзулуг дуза хереглеп турар – кадыы кызыгаарлыг кижилеривиске чедирери чугула.
Бо мөөрейни ыдыктыг Шагаа байырлалының бүдүүзүнде түңнеп турарывыс база анаа эвес. Буянныг ажылды кылырга, кижиниң бодунга 100 катап эглип келир болгай” – деп, Дина Оюн демдеглээн.
Мөөрейниң тиилекчилерин “Эки турачы чорук”, “Кадыкшыл”, “Социал ажыл”, “Өөредилге”, “Культура”, “Спорт”, “МИЧ – меценатство” болгаш оон-даа өске номинацияларга шаңнаан. Тиилекчи бүрүзүнге дипломнар, шаңнал бижиктерни болгаш өске-даа белектерни тывыскан.
Кызылдың уран чүүл колледжиниң хөгжүм школа-студиязының фортепиано башкызы Людмила Грехова база мөөрейге киришкен. Ол кадыы кызыгаарлыг-даа болза, салым-чаяанныг 2 уругну өөредип турар.
“Кадыы кызыгаарлыг уруглар-биле улуг ажыл мөөрейге киржир күзелди хенертен оттурупкан. Карааның көөрү кызыгаарлыг кыс уруг биле аутизмниг оол 2 чыл дургузунда мээң удуртулгам-биле өөренип турар. Уруглар-биле кичээлдеп эгелээриниң мурнунда кандыг түңнелге келиривис көңгүс билдинмес турган. Ынчалза-даа бистиң кады ажылдажылгавыстың ачызында хөй-ле бергелерни ажып эртип тургаш, эки түңнелдерни чедип алган бис. Чижээлээрге, көөрү кызыгаарлыг уруг Диана Гурцкая аттыг делегей чергелиг фестивальдың шилилге кезээнге киришкеш, дипломант болган” – деп, Людмила Грехова чугаалаан.
Ол ышкаш республикада шагда-ла билдингир апарган “Тываның буянныг чүректери” аныяктар каттыжыышкынының удуртукчузу Артыш Монгушту “Волонтёржу отряд” деп номинацияның тиилекчизиниң диплому-биле шаңнаан.
Тиилекчилер аразынче “Өңнүктежиил” деп төлевилелдиң ачызында кире бергенин ол демдеглээн. Ук төлевилелге Тываның кадыы кызыгаарлыг уругларын оларның кумирлери-биле ужураштырып, кандыг-даа хевирниң дузазын олар чедирип турганнар. Мөөрейге киржиринге дузалашкан кижилерге болгаш организакчыларга бедик шаңнал дээш өөрүп четтиргенин ол илереткен.
Ак-Довурак хоорайның өг-бүлелерге болгаш уругларга дуза чедирер төвүнүң социал ажылдакчызы Чинчи Ооржак база тиилекчиниң дипломун алган. Ол дендии хөй кижилерге дузалажып турарын демдеглээн: “Чааскаан чурттап чоруур, дуза хереглээн, кадыы кызыгаарлыг ажы-төлдүг өг-бүлелерге үргүлчү дузалажып турар мен”.
Буянныг чоруунуң орнун бодавайн, сагыш-сеткилиниң ханызындан кижилерге дуза чедирип, буянныг базымнар кылып чоруур кижилерни үнелеп, оларны шаңнап-мактап турары аажок өөрүнчүг. Шак ындыг шаңналдарны барык 40 чыгыы кижи алган.
Чыжыргана СААЯ.
Ада ТЮЛЮШТУҢ тырттырган чуруктары.
“Шын” №10 2024 чылдың февраль 10
