| Акция |
Шагаа байырлалынга уткуштур чоннар аразының он дугаар ачы-буян акциязы эгелээн. И.Г. Сафьянов аттыг орус культура төвү база Тыва Республикада «Россияның чоннар ассамблеязының» регионалдыг салбыры чаңчыл апарган хемчегни эрттирерин саналдаан. Акцияны Тыва Республиканың Чазаа база Националдар херектериниң талазы-биле агентилели деткээн.
Эрткен субботада И.Г. Сафьянов аттыг орус культура төвүнге акцияны ажыткан кол болуушкун болуп эрткен. Аңгы-аңгы назы-харлыг, омак-сөөктүг, мергежилдиг кижилер чыглып келгеш, Шагааның байырлал ширээзинге онза черни ээлээр чем – манчыны шупту кады кылганнар. Бо удаада Россияның Федералдыг айыыл чок чорук албанының Тыва Республикада кызыгаар эргелелиниң ажылдакчылары, 11 дугаар школада «Кызыгааржыларның аныяк өңнүктери» отрядтың кадеттери, Тыва Республиканың ИХЯ-зының ажылдакчылары — профилактика ажылдакчылары болгаш оларның хайгааралында уруглар акцияга каттышкан. Аңгы-аңгы нация чоннарның төлээлери, регионнуң Националдар херектериниң талазы-биле агентилелиниң коллективи, Орус культура төвүнүң активи манчы тударынга киришкен.
Буянныг эгелээшкинниң кол сорулгазы – буянныг ачы-дуза хереглеп турар өг-бүлелерге болгаш хоочуннарга дуза чедирери. «Акцияның кол утказы – чүгле манчы кылып, ону амзаары эвес, а улуг назылыгларга, хөй ажы-төлдүг өг-бүлелерге, аарыг кижилерге амданныг белектерни сөңнээр дээн бистиң киржикчилеривистиң кайгамчык саналы-дыр. Оон аңгыда белеткээн продукцияның чамдыызын тодаргай чурттаар чери чок улусту аъшкарып-чемгерзин дээш, Кызыл епархиязынга чылдың-на берип турар бис» — деп, И.Г. Сафьянов аттыг орус культура төвүнүң директору Вера Лапшакова чугаалаан.
«Буянны тудуп кыл» акция Тыва Республикада чурттап чоруур чоннарның аразында харылзааларын быжыглап, чоннарның культурлуг ужур-чаңчылдарын нептередиринче угланган. Чаңгыс демниң демдээ апарган манчы дыка хөй чоннарның чаңчылчаан чемнеринде бар, ынчалза-даа ооң холуксаалары болгаш аттары аңгы-аңгы.
Тываның Баштыңы Владислав Ховалыгның чарлааны Тургузукчу күш-ажылдың болгаш өг-бүле ыдыктарының чылында бо хемчег онза ужур-уткалыг апарган, чүге дизе манчы тудары – өг-бүлениң кайгамчык чаңчылы.
Киржикчилер манчы кылып тургаш, бодунуң чонунуң культурлуг онзагайларын таныштырып, манчылар кылыр чажыттарын аразында солчуп, үлешкеннер. Олар шупту кады демнежип, 52 кил манчыны кылганнар. Шак ындыг хемчеглер буянныг чүүлдү кылып нептередиринге Тываның чурттакчылары белен дээрзин бадыткап турарын организакчылар демдеглээн.
«Буянны тудуп кыл» деп акцияның эгелээн үезинден бээр чүс муң ажыг кижи – аңгы-аңгы чоннарның төлээлери, студентилер, школачылар болгаш хоочуннар киришкен.
Бистиң корр.
Чуруктарны ТР-ниң Чазааның парлалга албанындан алган.
“Шын” №4 2026 чылдың февраль 5
