ТР-ниң Дээди Хуралы «Быжыг өг-бүле – Күштүг Россия» деп республика чергелиг өг-бүле шуулганын эрттирип эгелээн. Ону Россияның чоннарының чаңгыс деминиң чылынга база Тывада Тургузукчу күш-ажылдың болгаш өг-бүле ыдыктарының чылынга тураскааткан. Аңаа күш-ажылчы ук-төөгүлүг болгаш интернационалчы өг-бүлелер киришкен.
Өг-бүле шуулганы бир дугаарында Чөөн-Хемчик кожууннуң Чадаанага болуп эрткен. Аңаа республиканың алды кожуунунуң төлээлери чыылган. Тываның ДХ-ниң депутаттары кол шииткекчилер болган.
“Өг-бүле дээрге кижиниң амыдыралында эң-не кол чүүл. Шупту үнелиг чүүлдер, чаңчылдар, ёзулалдар, кижизидилге өг-бүледен укталып үнер. Бо шуулган кончуг чугула болгаш ужур-уткалыг” – деп, Инна Монгуш чугаалаан.
Киржикчилер боттарының амыдырал-чуртталгазының оруктарын, национал ёзу-чаңчылдарын, профессионал чедиишкиннерин, ажы-төл кижизидилгезиниң аргаларын таныштырган.
"Бис, ук-ызыгуурлуг башкылар: авам Надежда Тас-ооловна Эрес-оол, кады төрээним Айгуля Донгак база мен Өвүр кожуунну төлээлеп чедип келдивис. Бистиң-биле кады ук-ызыгуурлуг малчыннарны көргүзүп, Монгуштарның өг-бүлези чедип келди" – деп, Өвүр кожуундан Буян Монгуш боттарын таныштырган.
Киржикчилер аразында хөй ажы-төлдүг өг-бүлелер база эвээш эвес.
«8 ажы-төлдүң – чеди оолдуң, бир кыстың ада-иези бис. Мээң өөм иштин Чейнеш Салчак дээр. Өг-бүлевис-биле мындыг шуулганнарда чаңгыс эвес удаа киржип тур бис. Бүгү назынывыста мал азырап чоруур бис» — деп, Мөңгүн-Тайгадан Артыш Салчак чугаалаан.
Бирги чаданың түңнелинде Мөңгүн-Тайга кожуундан Артыш биле Чейнеш Салчактарның мал ажыл-агыйлыг өг-бүлези, Өвүрден Чодураа Туматтың фермер өг-бүлези, Барыын-Хемчик кожуундан эмчилер Ылай-оол биле Зоя Сааяларның өг-бүлези, Ак-Довурактан Алексей, Аяна Маленовскийлерниң интернационалчы өг-бүлези, Сүт-Хөлден Али биле Саида Донгактарның үлегерлиг өг-бүлези база Чөөн-Хемчиктен башкы угбашкылар Нина Кара-Сал биле Ирина Санчы шуулганның пленарлыг кезээнче шилиттинген.
Өг-бүле шуулганының дараазында девискээр чадазынга бо удаа киришпээн база беш кожуун белеткенип турар. Үлегерлиг өг-бүлелерниң ужуражылгазы апрель 16-да Бай-Хаак суурга болуп эртер.
Бистиң корр.
Вячеслав МОНГУШТУҢ тырттырган чуруктары.
“Шын” №14 2026 чылдың апрель 16
