Теннис ойнакчыларын шылгаан
Чаа чылдың дыштаныр хонуктарында уругларның хостуг үезин кадык эрттирери-биле янзы-бүрү мастер-класстарны, өөредилге болгаш спортчу хемчеглерни организастаан. Ылаңгыя аныяк-өскенниң аразынга кадык амыдыралды деткииринче кичээнгейни угландырып турар.
Кызылда Тиилелге аттыг спортчу-культура комплекизи республиканың бүгү булуңнарының уругларының чыглыр чери апарган.
Чоокта чаа ук комплекске 16 харга чедир элээдилер аразынга теннис маргылдаазы болуп эрткен. Шак ол турнирге удавас Томск хоорайга болур улуг маргылдаага киржир тергииннерни тодаратканы ол. «Ийи дугаар чыл ойнап тур мен. Теннисти Сукпакта өөренип турар мен. Өңнүүм-биле маргылдаага киржир дугайында бүрүткелди эртип алгаш, киржип чедип келдивис» – деп, маргылдааның киржикчилериниң бирээзи Сыдым Куулар чугаалаан.
Стол теннизи дээрге кижиниң мээзин ажылдадырынга дыка эки арга-дыр. Ол кижиниң нерв системазын дүрген ажылдаарынче албадапкаш, кончуг дүрген бодандырыптар.
«Тиилелге» спортчу-культура комплекизиниң ачызында теннис маргылдаалары эрттирер черлиг апарганын Тыва Республиканың стол теннизиниң федерациязының даргазы Орлан Моңгуш демдеглээн.
2026 чылдың январь айдан эгелеп «Тиилелге» спортчу-культура комплекизинге теннис секциязы болуп эгелээр.
Бут бөмбүүнге тергииннерни тодараткан
«Школада бут бөмбүү» федералдыг төлевилел-биле организастаан школачылар аразынга Бүгү-российжи биче-футбол маргылдаазының регионалдыг чадазы болган.
Январь 4-тен 9-ка чедир болур маргылдаага Тываның аңгы-аңгы булуңнарындан 45 команда киржип келген. Эң-не тергиидээн командалар келир айда Сибирь федералдыг округка республиканы төлээлээр эргени чаалап алыр.
Чаа туттунган «Тиилелге» спортчу-культура төвү спортчуларны хаара тудар бир шөл болган.
Чаа чылдың согуну
Эрткен дыштаныр хүннерде Тыва Республиканың Ча адар федерациязы болгаш Спортчу белеткелдер төвү Кызыл хоорайга ча адыгжыларының аразынга маргылдаа эрттирген. Хемчегниң кол сорулгазы спорттуң ча адар хевирин республикага калбаа-биле сайзырадыры база 2026 чылдың тулган ча адыкчыларын илередири болур.
«Ча адарының чаа периферийлиг хевириниң бир дугаар болуп турар чемпионадынга Сибирь иштинге болгаш Россия деңнелдиг база делегей чергелиг маргылдааларга киржир тулган адыгжыларны тодарадып, шилип ап турарывыс бо» – деп, «ЦСКА Тыва» спорт школаның тренери Евгений Сарыглар чугаалаан.
Шак мындыг турнирлер дээрге анаа-ла маргылдаа эвес, а аныяктарга тыва улустуң адаанныг чараш оюннарының бирээзи ча адарының эки, чараш талаларын көргүзер арга дээрзин хемчегниң организакчылары демдеглеп турар.
Чемпионат республиканың спортчу календарында чугула болуушкун апарган. Ол чүгле тергиин адыгжыларны тодарадыры эвес, а Тывада шак бо оюн чырык келир үелиг, демниг, өзүп орар чаңчыл дээрзин көргүскен. Тиилекчилер төлептиг шаңналдарны, эң-не кол чүүл – бүгү-российжи маргылдааларга Тываның адын камгалаар эргени чаалап алган.
Ийи-талчылар тергиидээн
Чылдың-на Бай-Тал суурга бөмбүктүг хөккей маргылдаазын эрттирери чаңчыл болган. Эрткен дыштаныр хүннерде кышкы оюннуң ажыдыышкыны болган.
Бо удаада республика чергелиг спортчу хемчегни Тываның бөмбүктүг хөккей маргылдаазының каш дакпыр чемпиону Виктор Авыр-оолдуң чырык адынга тураскаадып, хөккейжиниң 75 харлаанын уткуштур ооң ажы-төлү биле төрелдери эрттирген.
Ийи хүн үргүлчүлээн маргылдаага республиканың аңгы-аңгы булуңнарындан тос команда киришкен.
Бирги черни Ийи-Талдың (Улуг-Хем), ийиги черни Кызыл-Дагның (Бай-Тайга), үшкү черни Россияның Онза байдалдар яамызының Тывада кол эргелелиниң Бай-Тайгада кезээниң, дөрткү черни Бай-Талдың (Бай-Тайга) командалары чаалап алган.
Хөккей сезонунуң ажыдыышкынынга Тываның бөмбүктүг хөккей федерациязының президентизи Май-оол Иргит база Бай-Тайга кожууннуң баштыңы Роберт Аракчаа олар чыылганнарга байыр чедиргеш, ойнакчыларга чедиишкиннерни күзээн.
Чаа чылдың шыдыраа маргылдаазы
Үнүп келген 2026 чылдың 1-2 хүннеринде Кызылдың немелде өөредилге төвүнге школачылар аразынга шыдыраа маргылдаазы болуп эрткен. Ону ТР-ниң Дээди Хуралының (Парламентизиниң) Даргазы Каң-оол Давааның деткимчези-биле эрттирген.
Чаа чылдың маргылдаазынга шупту 25 шыдыраачы киришкен. Оларның аразындан дараазында уруглар шаңналдыг черлерни алган:
Бирги бөлүкке 3-4 чыл шыдыраалап турар, разрядтыг уруглар аразынга алдын медальды Мөңгүн Сарыг-Лама, мөңгүн медальды Дүгер Допай чаалап алганнар. Дамба Ондар хүлер медальга төлептиг болган.
Ол-ла бөлүкке уруглар аразынга алдын медальды Ананда Донгак, мөңгүн медальды Долума Очур-оол чаалап алганнар. Чеди харлыг Антонина Маадыр-оол үшкү черни ээлээш, хүлер медальга төлептиг болган.
Чаа-ла шыдыраага белеткел чадазында ойнап эгелээн уруглар аразынга бирги черни Долаан Очур-оол, ийиги черни Тензин Сат бүзүрелдии-биле чаалап алганнар. Үшкү черге Долума Очур-оол төлептиг болган.
Эки түңнелдерни Даян Очур-оол, Даниэль Ооржак, Ай-Кыс Байкара маргылдаа үезинде көргүскен.
15 медальды чаалап эккелген
Красноярск хоорайга хостуг хүрешке 21 харга чедир оолдар, уруглар аразынга маргылдаа болуп эрткен. Маргылдаага аңгы-аңгы регионнардан спортчулар киришкен.
Тываның спортчулары маргылдаага тергиидээш, ниитизи-биле 15 медальды чаалап алган: 53 килге 2-ги черни Тана Тюлюш, 3-кү черни Чинчи Доңгак, 57 килге 1-ги черни Чадамба Доңгак, 3-кү черни Начын Күжүгет, Аяс Моңгуш, 61 килге 2-ги черни Найыр Сундуй-оол, 3-кү черни Алтаир Он, Чиңгис Сарыглар, 65 килге 2-ги черни Доржу Иргит, 3-кү черни Айдемир Попуу, Айыжы Лопчатмаа, 74 килге 2-ги черни Алан Ондар, 79 килге 2-ги черни Айыс Сарыглар, 86 килге 2-ги черни Чимит-Доржу Бады, 92 килге 1-ги черни Алаш Моңгуш, 2-ги черни Ананды Куулар, 3-кү черни Айдаш Серижикпей, Сыдым Куулар, 125 килге чедир спортчулар аразынга 4-кү черни Аюш Тюлюш чаалап алганнар.
Антонина Маадыр-оол Тываны төлээлээр
Кызыл хоорайның немелде өөредилге төвүнүң өөреникчизи Антонина Маадыр-оол Сибирь федералдыг округтуң бирги чери дээш маргылдаага тос харлыг уруглар аразынга хүлер медальды чаалап алганын республиканың немелде өөредилге сайзырадыр төвү дыңнаткан.
Новокузнецк хоорайга Сибирь федералдыг округтуң бирги чери дээш тос харлыг уруглар болгаш оолдар аразынга шыдыраа маргылдаазы болуп эрткенин сагындыраал.
Маргылдааның түңнелдери-биле Кызыл хоорайдан бичии Антонина тергиин оюнну көргүскеш, хүлер медальга төлептиг болган. Ол Россияның бирги чери дээш Дээди лигаже путевканы чаалап ап, Тываны төлээлээр. Маргылдаалар январь айның төнчүзүнде Сочиге эртер.
Антонинаның тренери – авазы Мария Маадыр-оол, Кызыл хоорайның немелде өөредилге төвүнүң тренер башкызы.
/ Айдың ОНДАР белеткээн.
Чуруктарны ТМГ-ден алган.
“Шын” №1 2026 чылдың январь 15