Шериглерниң IV делегей чергелиг маргылдаазы
"Сүбедей" спорт ордузунга октябрь 2-4 хүннеринде Россияның камгалал сайыдының Кубогу дээш IV делегей чергелиг спортчу хүрештер (грек-рим, хостуг) маргылдаазы бедик деңнелге болуп эрткен. Ук маргылдаага дараазында 14 чурттан: Россия, Белоруссия, Бразилия, Моол, Иран, Иордания, Тунис, Ливан, Алжир, Шри-Ланка, Армения, Сирия, Нигерия, Көрей Демократтыг Республикадан ниитизи-биле 130 мөге киришкен. Маргылдааның кол сорулгазы — “Россияда спорт” деп төлевилелди боттандырары, шериглер аразынга эп-найыралды быжыглаары, спортчу мергежилди бедидери база 2027 чылда шериглер аразынга делегей чемпионадынга белеткели.
Россияның Төп шериг девискээриниң удуртулгазы база республиканың Спорт яамызы чурум ёзугаар аалчыларны октябрь 1-2 хүннеринде тыва чаңчыл-биле уткуп, хуралды, спортчу белеткелди чоруткан. Ол ышкаш 55-ки гвардейжи даг-адыгжы шериг кезээ спортчуларның чурттаар черин хүлээнген.
Делегей чергелиг маргылдааның парад чыскаалы болгаш ажыдыышкынынга Тываның Чазак Даргазының оралакчызы Орлан Сарыглар, Төп спортчу клубтуң удуртукчузу полковник Артем Громов, Төп шериг девискээриниң күш-шыдал талазы-биле удуртукчузу, полковник Иван Кувырзин Азия төвү девискээринге келген шериг спортчуларга изиг байырны чедиргеннер. Россияның сенатору, Олимпий оюннарының 3 дакпыр чемпиону Александр Карелинниң шеригжи мөгелер аразынга чаа алдарлыг спортчулар төрүттүнерин база турнирге ам-даа сайзыралды күзээн телеграммазын видео дамчыштыр номчуп таныштырган.
Ийи хүн үргүлчүлээн солун маргылдааның түңнелинде дараазында командалар шаңналдыг черни алган: грек-рим база хостуг хүрештерниң 12 килдеринге Россияның 4 мөгези бир дугаар черни, 2-3 дугаар черлерде 10 шаңналды чаалап алгаш, команда талазы-биле 1-ги черге төлептиг болган, оларның аразында тыва мөгелер — 57 килге Кежик Седен, Амир Седен, Аяндай Ондар, 65 килге Кежик Монгуш, 86 килге Шойдун Субудай, 97 килге Бады-Маадыр Самдан, 125 килге Айдың Монгуш; бодунуң килинге Аяндай Ондар шаңналдыг 3-кү черни алган база 97 килге 1-ги черни Бады-Маадыр Самдан алган.
Команда талазы-биле 3 чемпионнуг, 4 шаңналдыг Иранның командазы 2 дугаар черге төлептиг болган. Белоруссияның командазы 7 шаңналдыг 3-кү черни алганнар.
1-3 дугаар черлер алган командалар кубок, медаль, дипломнарга төлептиг болганнар. Тускай шаңналдарга 2 чемпионнуг 2-3 дугаар черде 2 шаңналдыг Кореяның база 2-3 дугаар черде 5 шаңналдыг Алжирниң, 3 дугаар черде 1 шаңналдыг Тунис командалары төлептиг болганнар.
Маргылдааның кол шииткекчизи Александр Беляковский база кол секретары Саток Кенден “Тергиин шииткекчи” база “Чараш хүреш” дээш шылгараан мөгелерге өртектиг белектерни тывыскан.
Дөрт дугаар делегей чергелиг маргылдааның сорулгазында Кызылда, Чадаанада Төп шеригниң спортчу клубтарынга база Кызылда президентиниң кадет училищезинге грек-рим хүрешке Олимпий оюннарының чемпиону Ислам-Бек Альбиев биле хостуг хүрешке Олимпий оюннарының хүлер медаль эдилекчизи Гаджимурад Рашидов “Мерген аргалар” деп дуржулгалыг өөредигни чоруткан.
Чадаанага бирги делегей маргылдаазы
Чадаанада Күш-культура болгаш кадыкшыл өргээзинге октябрь 1-2 хүннеринде Шеригниң Төп Спортчу клуву 2012-2013 чылдың оолдар аразынга I дугаар делегей чергелиг хостуг хүреш маргылдаазы солун байдалга болуп эрткен. Маргылдаага Моолдуң Увс аймактан база Тывадан 8 команда, ниитизи-биле 88 мөге киришен. Маргылдааның кол сорулгазы “Хүрешти школаже” база “Спортту школаже” деп төлевилелдерни боттандырары болур.
Баштайгы делегей чергелиг маргылдааның ажыдыышкынынга Төп спортчу Клубтуң удуртукчузу полковник Артем Громов, Олимпиада чемпиону Ислам‑Бек Альбиев база Олимпиаданың 3-кү шаңнал эдилекчизи Гаджимурад Рашидов сөс ап, бичии мөгелерге байырны чедирип, спортчу чедиишкиннерни күзээннер.
Ачыр-дачыр маргылдааның түңнелинде командалар аразынга 1 дугаар черни “Чемпионнарның чүректери” деп спортчу клуб мөгелери, 2 дугаарын Кызылдың ШТСК-Тыва, 3-кү черни Чөөн-Хемчик кожууннуң командалары алганнар.
Хүндүлүг аалчы Артем Громов оолдарның чараш, соруктуг, бедик хүрежин демдеглээни бичии мөгелерге, тренер башкыларга улуг өөрүшкү болган.
Тыва спортчуларның чедиишкиннери
Октябрь 4-те Японияның Токио хоорайга спорттуң панкратион база холушкак хевиринге Тывада ОБЯ-ның төлээзи Начын Сат биле япон спортчу Кадзуки Касаиниң аразында ужуражылга болган. Ол делегей чергелиг ужуражылга дүрүм ёзугаар 5 минута, 3 раундуга эртер турган.
Ол ужуражылгага Начын Сат бедик белеткелин бадыткап, удурланыкчызын 4 минута 19 секунда иштинде нокаут-биле тиилээни улуг чедиишкин болган. Спортчуга база тренер башкызы Артыш Артуровичиге тыва аарыкчылардан изиг байырны чедирбишаан, быжыг кадыкшылды база бедик спортчу чедиишкиннерни күзедивис.
Дараазында база-ла Япониядан Азия чоннарының оюннарында хостуг хүрешке Казах Республика дээш хүрежип турар делегей чергелиг спорт мастери Начын Куулар 65 килге 3-кү шаңналдыг черни алганы улуг чедиишкин база алдар.
Санкт-Петербург хоорайга сентябрь 25-27 хүннеринде Александр Невский Кубогу дээш ММА-га делегей чергелиг маргылдаа болуп эрткен. Аңаа бистиң дараазында спортчуларывыс эки киришкеннер. Бодунуң килинге алдын медальга Түмэр Ондар төлептиг бооп, эштериниң хей-аъдын көдүрген. Ийи дугаар шаңналдыг черни Алдар Имажап, 3-кү шаңналдыг черлерни Ай-Демир Сат биле Тайга-Сылдыс Алдын-оол алган. Эр хейлер!
Россияның Чепсектиг Күштериниң Кубогу дээш самбо хүреш маргылдаазы октябрь 4-те доозулган. Ол маргылдаага ТШО-нуң киржикчизи Аржаан Чылбак 58 килдиг мөгелер аразынга 2-ги черни ап, хүлер медальга төлептиг болган. Мөгеге база тренер башкыларынга изиг байыр база бедик спортчу чедиишкиннерни күзедивис.
/ Алексей ЧАМБАЛ-ООЛ,спорттуң хоочуну.
Чуруктарны “Тыва спорт” каналдан база ТР-ниң Спорт яамызының соцчеткиде арнындан алган.
“Шын” № 39 2026 чылдың октябрь 8
"Шын" солуннуң МАХ-каналынга каттыжыңар: max.ru/channel_shyn