Көдээ ишчилерге сиген кезилдезиниң кидин түлүк үези чоруп турар. Малчыннар агаар-бойдустуң чаңнап келирин-даа тоовайн, кызыл дерин төп тургаш, мал чемин белеткей бергеннер.
Сиген кезер шөлдүң ниити хемчээли 14 муң гектар. Эрткен чылын хөй чылдыг үнүштер шөлү 195 га, а бо чылын 283 га болган.
Амгы үеде кожуунда 2987 гектар черде сигенни кескен, 2390 гектар черде сигенни чыып каапкан. 100 тонн шык сигенни (люцернаны), 2587 тонн кургаг мал чемин алган. Мал чеминиң белеткелинге аңгы-аңгы маркаларның 56 тракторун, 40 сиген кезер машинаны, 31 дырбаашты, 13 сиген пресстээр херекселди хаара туткан. Ниитизи-биле дериг-херексел-биле чүмнеттинген 9 бригад ажылдап турар.
“Шөлде ажылдарже тус черниң чонун хаара туткан. Шупту 166 кижи ажылдап турар. Оларның 22-зи студентилер, 3-ү чонну ажылга хаара тудар төптүң учёдунда. Суурлар аразындан Хайыракан, Ийме, Баян-Тала тергиидеп турар” – деп, кожууннуң көдээ ажыл-агый эргелелиниң даргазы А.Б. Ооржак дыңнаткан.
