Июль айның төнчүзүнде Тыва бодунуң девискээринге Бүгү-российжи улуг маргылдааны эрттирер. Неделя дургузунда (июль 28-тен август 2-ге чедир) регионнуң найысылалынга ча адарының талазы-биле Россияның Кубогу дээш улуг маргылдаа болур.
Маргылдаа эр болгаш кыс спортчулар аразынга эртер. Баш бурунгаар санап турары-биле алырга, спортчу улуг хемчегге Россияның аңгы-аңгы регионнарындан 460 хире шыырак ча адыкчылары киржир. Республиканың чыынды командазының составында 16 спортчу бар.
Маргылдааның программазында классиктиг ча-биле 70 метр хемчээлге база блоктуг ча-биле 50 метр дистанциядан адары кирип турар.
Июль 28-те — киржикчилерниң кээри, маргылдааже киирер эрге талазы-биле комиссияның ажылы.
Июль 29-та — албан ёзузу-биле тренировка хүнү, техниктиг комиссия.
Июль 30-ден август 1-ге чедир — маргылдааның кол хүннери.
Август 2 — киржикчилерниң чоруур хүнү.
Эрткен чайын Тыва Республика бүгү чурттуң тергиин дээн ча адыкчыларын хүлээп алганын сагындыраал. Ынчан регион июль айның эгезинде ча адарының Россия Чемпионадын эрттирген. Маргылдаа ынчан Совет Тываның 5 чыл стадионунга үш хүн үргүлчүлээн. Аңаа чурттуң 20 ажыг регионундан 300 хире спортчулар киришкен.
Түңнелинде командалар аразынга Москваның ча адыкчыларының командазы тергиидээн. Ийиги черге Бурятияның командазы, а үшкүзүнге Ямал-Ненец автономнуг округтуң командазы төлептиг болган. Тыва Республиканың командазы бешки черни алган.
Ынчан РФ-тиң Ча адар спорттуң федерациязының президентизи Владимир Ешеев маргылдааны тергиин организастааны дээш, Тываның Баштыңынга болгаш регионнуң Спорт яамызынга, ол ышкаш волонтёрларга болгаш судьяларга өөрүп четтиргенин илереткен. Маргылдааның болур черин шилип алган чылдагаа- ны — Тывада бо спорттуң хевиринге классиктиг ча адарының чемпионнарының бары, ол дээрге 2012 чылда Паралимпий оюннарының мөңгүн медаль эдилекчизи Михаил Оюн биле Россияның, Европаның болгаш СНГ-ниң чемпиону Елена Достай дээрзин ол демдеглээн.
А. СОЯН белеткээн.
Чурукту ТР-ниң Чазааның парлалга албанындан алган.
“Шын” №27 2025 чылдың июль 17
