Бо чылдыӊ эгезинден тура республикада 35,6 муӊ ажыг уругларныӊ ада-иелери, 1,9 муӊ иштиг херээжен улус чаӊгыс аай пособиени ап турар.
Өг-бүлелерге бо үениӊ дургузунда 1 миллиард ажыг рубльди шилчиткен дээрзин Россияныӊ Социал фондузунуӊ Тывада салбыры дыӊнадып турар.
Ажы-төлдүг өг-бүлелерниӊ амыдырап-чурттаарынга дузалап, күрүнениӊ талазындан деткимче кылдыр 0—3 харлыг, 3—7 харлыг, 8—17 харлыг уругларга, иштиг херээжен улуска ай санында берип турган дузаламчы акшаны «чаӊгыс аай пособие» кылдыр өскерткен.
Чаңгыс аай пособиени ажы-төлдүг өг-бүлелерге, удавас ава болур улуска бээр. Ону томуйлаарда, өг-бүледе кижи бүрүзүнүӊ амыдыраарынга көрдүнген акша орулгазыныӊ кудуку хемчээлинге даяныр. Республикада бичии уругларга бир айда ооӊ хемчээли – 14 433 рубль, а ажылдап шыдаар улуг кижилерге – 15 826 рубль кылдыр бадылаан.
Бир эвес 3—7 харлыг, 8—17 харлыг уругларныӊ 2022 чылда томуйлаан пособиезиниӊ хуусаазы доосту бээр болза, чаӊгыс аай пособие бээриниӊ дугайында билдириишкин бижиир.
Билдириишкинни Күрүне ачы-дузазыныӊ Госуслуги порталын таварыштыр чорудар. Оон аӊгыда, Тывада Социал фондунуӊ салбырыныӊ клиентилер-биле ажылдаар албанынга азы МФЦ төвүнге барып четкеш, билдириишкинни киирип болур.
Социал фондунуӊ регионалдыг салбырыныӊ специалистери-биле сүмележип, тодаргай медээлерни тайылбырладып ап болур.
Регионалдыг контакт-төвүнүӊ харылзажыр телефону:
8-800-200-0543.
Р. ДЕМЧИК очулдурган.
"Шын" №35 2023 чылдың май 17