Бөгүн, март 17-де, Тываның доозукчуларының ада-иелери Чаңгыс аай күрүне шылгалдазын дужаар Россия чергелиг акцияга идепкейлии-биле киришкен. Бо удаа акция республикада 7 дугаар эртип турар. Ооң кол сорулгазы – ада-иелерге шылгалдалар дужаарының чурумун таныштырары.
Кызылдың 3 дугаар школазынга чүгле ада-иелер эвес, чазак-чагырганың болгаш хөй-ниитиниң төлээлери шылгалданың эртериниң чуруму-биле танышкан: шылгалданың болур черинче киирери, документ-биле бүрүткелди эртери, олуттарга айыткан чурум ёзугаар олурары, шылгалданың инструкциязы-биле таныжары, хыналда ажылдарны класс иштинге парладып үндүрери, шылгалда бланкыларын долдурарының болгаш хыналда ажылдарны бижиириниң бүгү чурумун эрткен.
«Шылгалданы эки эрттивис. Даалгаларның шын харыыларын биске бээрге, бичии девидедивис. Айтырыглар шупту шыңгыы-дыр, чогаадыгны база бижидивис. Шылгалданың чурумун иштинден бодум ийи караам-биле көрүп, дуржулганы алдым. Күрүнениң шылгалдаларынга ада-иелер харыысалгалыг болуп, уруг-дарыывыстың боттарынга бүзүрелдиг болуру бистиң деткимчевистен хамааржырын көрдүм» - деп, Кызылдың 1 дугаар школазының өөреникчизиниң авазы Снежана Кыргыс шылгалда соонда бодунуң бодалы-биле үлешкен.
«Шак мындыг хемчеглерни эрттирип турарын эки деп бодаар мен. Шылгалда үезинде уругларның чүнү бодап турарын, канчаар сагыш човап турарын билип алырда, бо акцияга киржири чугула. Айтырыглар болгаш даалгалар ниитизи-биле берге эвес-тир. Өөреникчилер шылгалдага эки белеткенип алыр болза, түңнели эки болур» - деп, Кызылдың 7 дугаар школазының өөреникчизиниң авазы Белек-кыс Серен чугаалаан.
«Акцияга ада-иелер идепкейлии-биле киришкен. Олар уругларының орнунче боттарын салып, шылгалданың ажылдарын бижээн. Шылгалданы эрттирип турар башкыларның болгаш доозукчуларның сагыш-сеткилиниң байдалын база моон билип ап болур» - деп, Кызылдың 3 дугаар школазының директору Наталья Заболотнева дыңнаткан.
Хемчегниң соонда «Айтырыг-харыы» хевиринге ажык чугаага ада-иелер школаның шылгалда эрттирер чериниң удуртукчузунга айтырыгларны салып, чугаалашкан.
Билиг шынарын хынаар институттуң медээзи-биле А. Донгак белеткээн.
