Белек дугайында бодаптарга, бир-ле дугаар чоок кижилериңер башка кирип кээр болгай. Оттуг Аът чылында ынак улузунга чүнү бээр болза экил?
Өөнүң ээзинге белек шилип тургаш, эрес-сорук база күш-шыдалды көргүзүп турар чүүлдерже кичээнгей салыр, ол ышкаш ооң сонуургалдарын болгаш амы-хуу тускайлаңын илередир эт-сеп: спортка херек аксессуарлар база активчи дыштанылгага (машиназынга гаджеттер азы чадаг-терге, турисчи херекселдер, смарт-шак, термос). Эр улуска онзагай аксессуарлар: акша хавы, портмоне, хөмден кылган кур. Аът дүрзүлүг статуэткалар, чуруктар азы суй белектер база болур.
Өөнүң иштинге белек шилиирде, ооң чаражын, ажыл-ишчизин база тускайлаңын айтып турар чүүлдерже көөр. Чижээ, чылыг өңнүг даштарлыг каасталгалар азы алдын-кызыл аксессуарлар; каасталгалар шыгжаар аянныг шкатулка, косметичка, чараш сумка; бажың каастаар чүүлдер — чурук, ваза азы от өңнүг светильник; СПА-процедураларже, массажче сертификат.
Ажы-төлге Чаа чыл белектери байырланчыг шинчи киирер болгаш уругнуң назынынга база сонуургалынга дүгжүр боор ужурлуг. Эң-не ажыктыг белектер: стол оюннары, олар Чаа чылдың узун дыштаныр хүннеринде өг-бүлени демнештирер; спортчу херекселдер (шанак, коньки, хаак, чадаг-терге); бир-ле шоу, циркче азы Чаа чыл шиизинче билет; чараш хаптыг чигирзиг белектер.
Уругну белектер чүгле өөртүр эвес, чылдың энергиязын база алырга эки, чижээ, Аът ойнааракчыгашты азы аът дүрзүлүг суй белекти белээнче немей суп каар.
Ада-иезинге Оттуг Аът чылында сагыш-сеткилин өөртүр таарымчалыг, ажыктыг белектер бээр, чижээ: пледтер, аржыылдар, стол шывыы; сава азы Чаа чылдың өңүнге дүүштүр сервиз; Аъттың демдээн көргүскен бажың херекселдери; электрилиг техника: мультиварка, угаанныг колонка; санаторийже путёвка азы кадыкшыл процедураларынга абонемент; ынак хоббизинге дүүштүр, чижээ, дачазынга салыр чараш дүрзүлер азы мөөгүлээрде тудар корзина.
Эш-өөрүнгебелектерни чүгле өөрүшкү сөңнээр эвес, а амыдыралынга ажыктыг кылдыр шилиири чугула. Оттуг Аът чылында активчи болур, өөрүшкү бээр белектер таарымчалыг. Хөй кижи ойнаар стол оюннары, бажыңга ажыглаар тускай аксессуарлар, темалыг календарьлар азы чогаадыкчы ажылдар кылыр чүүлдер. А эң-не чоок эштеринге бир онзагай плед, парфюм, ном азы сертификат берип болур.
Белектер солчуп тура, араңарда ынакшылыңарны, найыралыңарны сагындырып турар база багай чүүлдерден камгалаар камгалалдар бээри эң-не өөрүнчүг.
Чуруктарны интернеттен хоолгалаан.
“Шын” №49 2025 чылдың декабрь 18