Дүүн, октябрь 11-де, юбилейлиг байырлал хүнүнде найысылалдың Столичный микрорайонунда чаа туттунган хөй аал чурттаар бажыңнарның дүлгүүрлерин ээлеринге байырлыг байдалга тывыскан.
Ук хемчегге Тываның Баштыңы Владислав Ховалыг биле Россияның Президентизиниң Сибирьде бүрүн эргелиг төлээзи Анатолий Серышев киришкен. Олар чаа бажың алган чурттакчыларның өөрүшкүзүн үлежип, байырын чедиргеннер.
Регионалдыг чиигелделиг ипотека программазының ачызында чурттаар чаа оран-сава алыры чогумчалыг апарган дээрзин Тываның Баштыңы демдеглээн. Ол бот-эгелээшкинни республиканың чурттакчыларының чурттаар оран-сава байдалын экижидеринче болгаш тудуг адырын деткииринче угландырган.
Бистиң корр.
«Шын» №78 2024 чылдың октябрь 12
