Чаа чылды чаа-чаа бодалдар-биле, арыг сеткил, эки күзээшкиннер-биле уткууру билдингир. Чаартылгалар болгаш буян-кежикти өг-бүлеже киирбейн барып болур чүүлдерден Чаа чыл бүдүүзүнде адырлып алганы дээре. Ол чүлер бооп болурул, сонуургап көрээлиңер чаа. Силерде бар-дыр бе, хараадавайн, октаптар болза ажырбас.
Силерге таарышпас хеп. Бичиилеп азы хозап калган, кедерге, эпчок, ында-мында шиштеп турар, кижиргенчиг, чамдык черлерде сөктүп, орлу берген идик-хепти октааны дээре.
Бүдүн чыл кетпейн барганыңар шкафта доозунналы берген турар кончуг ынак турган хевиңер ам силерге херекчок.
Эрги иштики хеп, уктар. Чеже-даа аар өртектиг болза, чылдары-биле эледир, өңүн чидир, шөйүлдүр, хевирин үрей кедип каапкан болзуңарза, база октаптыңар.
Дыка чараш, ынчалза-даа кедип алгаш, кылаштаарга, эпчок апарган идиктер. Оларны кедип алгаш, 15 минута иштинде бут кырынга туруп, кылаштап шенеп көрүңерем. Бир эвес дораан буттарыңар шылап каар азы өйүп, кызып турар хире болза, оларның база херээ чок.
Эргилеп, элеп калган, хүлээлгезин эрттир күүседип каан идик-хеп база Чаа чылче ашпас болза эки.
Шак мынчаар арыгланып, херекчок чүүлдерден адырлып алырга, бажың-даа арыг-силиг болур, сагыш-сеткил-даа чиик болгаш буян-кежик доктаар ужурлуг.
Чуруктарны интернеттен алган.
“Шын” №50 2025 чылдың декабрь 25