Декабрь 16-да тускай шериг операциязында киржип турар дайынчыларга бо чылдың сөөлгү кышкы гуманитарлыг ачы-дузазын аъткарган. Ноябрь 12-де эгелээн акция-биле чыгдынган 20 тонна чүък республикадан Донецк уунче үнүп турары бо.
Дайынчы хөделиишкиннер девискээринде чаңгыс чер чурттугларывыска деткимче чыыр ажылды Улусчу фронтунуң регионалдыг салбыры Тыва Республиканың Чазаа-биле кады «Шупту чүүлдү Тиилелге дээш!» федералдыг акцияның деткимчези-биле күүседип турар.
Улусчу фронтунуң күүсекчи комитединиң регионалдыг салбырының удуртукчузу Саима Далчинниң чугаалааны-биле алырга, шупту муниципалитеттер, организациялар, сайгарлыкчылар, волонтёр пунктулары база буянныг чон орукче үнер чүъкче Лада Приора биле УАЗ "буханка" деп ийи машинаны, ийи мотоциклди, чаштынар четкилерни, генераторларны, чылыг пушкаларын болгаш чылыг идик-хептерни чыып дамчыткан. Ол ышкаш Донда Ростов хоорайда Чаңгыс аай дүүштүрүлге төвүнче орун-дөжек болгаш аъш-чемни, Тываның шефке алганы ЛУР-нуң Свердловск хоорайның уругларынга чигирзиг белектерни чоруткан.
Кышкы гуманитарлыг чыылдага Федералдыг кеземче күүселде албанының ажылдакчылары ТШО зоназынче чаа квадроциклди, Сүт-Хөл кожууннуң Кызыл-Тайга ортумак школазы оңгу лааларын, дайынчыларга чылыг чеңи-чоктарны, аргаан уктарны, хол-хаптарын, 20 килограмм эътти, а «Деткимче» фондузу чаштынар четкилерни болгаш чаа чылдың чигирзиг белектерин чоруткан.
«Дайынчы хөделиишкиннер девискээринде дайынчыларывыстың дилээ-биле бистиң яамы УАЗ «буханканы» мурнуку одуругда тулчуп турар чаңгыс чер чурттугларывысче чорудуп турарывыс бо. Кышкы дугуйларын салгаш, чедер-четпестерин доозазын четчелээн бис» – деп, ТР-ниң социал политика сайыдының бир дугаар оралакчызы Сылдыс Ондар чугаалады.
Оон ыңай Тыва Республикада Камбы-лама эргелелиниң башкылары болгаш Россияның Буддистер ассамблеязының волонтерларының удуртулгазы бөгүн сес дугаар гуманитарлыг деткимчеге кывар-чаар чүүлдер-биле ажылдаар генераторларны, чаштынар четкилерни, 8 снайперлер хевин, дайынчы бүрүзүнге хей-аът көдүрер тариналар бижээн 200 хире чагааларны, уктарны эккеп хүлээткен.
«Тыва Республиканың Баштыңы Владислав Ховалыгның даалгазы-биле «Деткимче» регионалдыг фонд бо удаада гуманитарлыг дуза чедирер чүък машиналарынга, 20 тоннаның бир, 5 тоннаның ийи, ниитизи-биле үш чүък машиназынга кудар кывар-чаар чүүлдү харыылаан. Оон аңгыда Свердловск хоорайның тайбың чурттакчыларының ажы-төлүнге «Восток», «Өлчей», «Суугу», «Полигон» КХН-нерниң чыгган акшазы-биле Чаа чыл уткуштур 1500 чигирзиг белектерни болгаш школа-интернатка телевизорну немей саткаш чорудуп тур бис»– деп, «Деткимче» регионалдыг фондунуң удуртукчузу Артыш Иргит чугаалады.
Гуманитарлыг чүъктү Донецк хоорайда Чаңгыс аай дүүштүрүлге төвүнге дүжүрер. Тывадан шериглерлиг кезектерниң Командирлер чөвүлели шериг албанныгларга посылкаларны дамчыдып хуваар.
Республикада шупту муниципалдыг тургузугларның чыгганы доңурган эъттерлиг 5 тонна кирер соодукчулуг ийи автомашина декабрь 17-де орукче үнүптер. Шупту 6,5 тонна ажыг чүък үнер. Бирги чүък машиназы Донецкиже углай, а эът болгаш гуманитарлыг дуза чүдүрген өске машина Курск обласче аъттаныптар.
Гуманитарлыг чүък декабрь 25-те адрестеринге чеде бээрин Улусчу фронт дыңнаткан.
Тываның лама башкылары чоннуң чыгганы гуманитарлыг чүък чүдүрген машиналарның чолаачыларынга чедер черинге орук-суур менди-чаагай чедерин күзээш, артыжап үдээн.
Айдың ОНДАР.
Буян ООРЖАКТЫҢ тырттырган чуруктары.
“Шын” №49 2025 чылдың декабрь 18
