| Саң-хөө сүмелекчизи |
Байырлалдар үезинде эпчок чүүлдерден чайлаары-биле бюджедиңерни баш бурунгаар планнап алыңар. Чаа чылдың садыглаашкынынче үндүрер чарыгдалын планнаары чугула.
Бюджедиңерниң кол чарыгдалдарын тодарадыңар:
Белектер. Өг-бүлеңерниң кежигүннеринге болгаш чоок улузуңарга сөңнээр белектериңерниң өртек-үнезин санааш, даңзыже киирип алыңар.
Чаа чыл столу. Аъш-чемче чарыгдалдарның өртээн санап тургузуңар.
Байырлал каасталгалары болгаш өске-даа херек чүүлдерже база.
Бар акша түңүнче сорулганы салыңар. Чижээ, силерниң бюджедиңер 8 муң рубль дижик, ол лимиттен ажыр чарбазын кызыдыңар.
Чарыгдалдарыңарны башкарып өөрениңер. Ону ажыглаарда, контрольдаар аргаларны ажыглаңар:
Акшаңарны категория аайы-биле хуваап алыңар, ынчангаш категория бүрүзүнге доктааттынган санныг акшаны чагаа хавынга суккаш чарыңар.
Саң-хөө чорудар капсырылгадан киирип алыңар, аңаа лимитти тургускаш, чарыгдалыңарны хайгаарап болур силер.
Садып алган чүүлдериңерни демдеглеп ап туруңар, ол чарыгдалыңарның ниити хемчээлин хайгаараарынга дузалаар.
Байырлал бүдүүзүнүң чиигелделеринге алыспаңар. Чиигелделер манаар орнунга эргежок чугула барааннарны баш бурунгаар өөренип көрүңер. Өртектерни деңзигүүрлеңер. Садар чүүлдериңерниң даңзызын шуптузун эде көрүңер, ылап-ла чүү херегил, а чүү күткүлге-дир дээн ышкаш.
Чаа чыл садыглаашкынынга медерелдиг болуңар: байырлалга эргежок чугула, херек чүүлдерни шилиңер. Кевин херекчок чүүлдер сатпаңар. Садыгларның баартактары шаажаң аътчыгаштар дүрзүлери дээн ышкаш хөй-ле суй белектер-биле долган болур, оларны садарын далашпаңар.
Эш-өөрүңерни азы коллегаларыңарны өөртүксээр болзуңарза, сагыш-сеткилге таарымчалыг чүүлдерден чогаадырын кызыдыңар. Чижээ, бодуңарның быжырган тооруктуг азы изюмнуг печенье, пряниктериңер азы чылыг-чымчак сөстер бижээн открыткалар кымга-даа өөрүнчүг.
Чаа чылды бажыңыңарга байырлаңар. Бажыңынга дөргүл-төрели азы эш-өөрү-биле демдеглээри, ресторан, клубтар азы хоорайдан дашкаар дыштанылгага бодаарга, канчап-даа бюджетке камналгалыг болур. Байырлал ширээзин салырда, чарыгдалдарны үлежип алгаш, катай дериир кылдыр дугуржуп алыңар. Чок болза кижи бүрүзү ниити столга салыр чемни боттары кылып алгаш келир.
2026 чылда саң-хөө чаңчылынга чагыртырын сүмелээр-дир бис:
⛄Орулга болгаш чарыгдал санаашкынын кылып эгелеңер;
⛄ Бодал чок чарыгдал кылырда, “чок” деп өөрениңер;
⛄ Саң-хөө планын сагыңар;
⛄ Саң-хөө курлавырын тургузуп алыңар;
⛄ Инвестициядан орулга ап өөрениңер. Эң-не бөдүүн аргазы – банкыга акша шыгжаары.
Алдынай АРАКЧАА белеткээн.
Чурукту ТМГ-ден алган.
“Шын” №50 2025 чылдың декабрь 25